Elena Rybakına álemdik reıtıngide bir satyǵa tómendedi

ASTANA. QazAqparat – Áıelder tennısi qaýymdastyǵy (WTA) jańartylǵan reıtıngini jarııalady, dep habarlaıdy QazAqparat tilshisi.

Qazaqstannyń birinshi raketkasy Elena Rybakına dúnıejúzilik reıtıngide jeke synda 25-ten 26-satyǵa tómendedi.

Taǵy bir qazaqstandyq ıÝlııa Pýtıntseva 42-den 47-ge, bıyl maýsymdy erte támamdaǵan Zarına Dııas 324-ten 356-ǵa syrǵydy.

Reıtıngide burynǵysha Polsha ókili Iga Sventek kósh bastap keledi. Týnıstik Ons Jaber ekinshi satyda. Al Tallınde WTA 250 jarysynyń fınalyna deıin jetken estonııalyq Anett Kontaveıt úshinshi orynǵa kóterildi.

Juptyq synda alǵashqy úshtik ózgerissiz: chehııalyqtar Katerına Sınıakova men Barbora Kreıchıkova jáne belgııalyq Elıze Mertens eshkimge jol berer emes.

Qazaqstandyqtardan Anna Danılına 21-inshi, E.Rybakına 99-orynda.

Aıta keteıik, E.Rybakına osy aptada Ostrava (Chehııa) WTA 500 dodasynda óner kórsetedi. Ol búgin alǵashqy aınalymda álemniń 17-raketkasy, amerıkalyq Medıson Kızben kortqa shyǵady.

Budan buryn elordada Astana Open ATP 500 týrnıriniń irikteý saıystary aıaqtalǵanyn jazǵan bolatynbyz.

Búgin Astanada negizgi jarys oıyndary bastalady.

Foto: ktf.kz