Elena Rybakınanyń jeńis serııasy Doha týrnırinde toqtady
ASTANA. KAZINFORM — Qazaqstannyń birinshi, álemniń 3-raketkasy Elena Rybakına Doha (Qatar) WTA 1000 týrnıriniń jartylaı fınalynan tys qaldy.
Jarystyń 2-raketkasy bolyp tirkelgen E.Rybakına shırek fınalda reıtıngide 13-oryndaǵy kanadalyq, 19 jastaǵy Vıktorııa Mbokomen oınady.
V.Mboko tennıs áleminde ótken jyldan beri jarqyraı kóringen jas juldyz bolatyn. Osyǵan deıin qarsylastar úsh ret kezdesip, sonyń ekeýinde qazaqstandyq sportshy jeńgen edi.
Bul joly kanadalyq tennısshi sátti bastap, 2:0 esebimen alǵa shyqqanymen, Elena tarazy basyn teńestire bildi. Sodan keıin taǵy bir breık jasap, esepti 5:3-ke jetkizdi. Alaıda budan keıin qatarynan tórt geımdi berip qoıdy — 5:7.
Ekinshi sette Rybakına breıkpen alǵa ketti — 3:1. Kanadalyq sportshy da qalyspady — 3:3. Degenmen Elena qaıtadan breık jasap, sol basymdylyǵyn saqtap qaldy — 6:4.
Úshinshi, sheshýshi partııada qazaqstandyq sportshy 4:2 esebimen alǵa shyqqanymen, Mboko qýyp jetti — 4:4. Sosyn Rybakına dop bergende, V.Mboko tórtinshi matchbolyn paıdalanyp ketti — 6:4.
Eki saǵat 24 mınýtqa sozylǵan tartysty básekede Rybakına 11 eıspen birge 9 breık-poınttyń beseýin óz esebine jazdy. Mboko 6 eıs, 6 breıkpen (12 breık-poınt) erekshelendi. Osylaısha, Aýstralııa ashyq chempıonatyn qosa alǵanda, E.Rybakınanyń 9 matchqa sozylǵan jeńis serııasy toqtady.
V.Mboko fınalǵa shyǵý úshin álemniń 24-raketkasy, latvııalyq Elena Ostapenkomen talasady. Ol shırek fınalda reıtıngide 57-oryndaǵy ıtalııalyq Elızabetta Kochcharettodan aılasyn asyrdy — 7:5, 6:4.
Álemniń ekinshi, osy týrnırdiń birinshi raketkasy, Polsha ókili Iga Shventek kútpegen jerden shırek fınalda reıtıngide 52-oryndaǵy grekııalyq Marııa Sakkarıdan utylyp qaldy — 6:2, 4:6, 5:7.
Eger E.Rybakına Dohada fınalǵa deıin jetkende, álemniń 2-raketkasy atanatyn edi. Al V.Mboko dúısenbide jańartylatyn reıtıngide 10-orynǵa kóteriledi.
Eske sala keteıik, budan buryn Elena Rybakınanyń Qatardaǵy týrnırde Olımpıada chempıonyn utqanyn jazǵan edik.
Sondaı-aq Rotterdam týrnırinde Aleksandr Býblık azýly qarsylasynan aılasyn asyrdy. Al Anna Danılına Doha týrnıriniń jartylaı fınalynda oınaıdy.