Elena Rybakınanyń komandasyna jańa bapker qosyldy

ASTANA. KAZINFORM — Qazaqstannyń birinshi raketkasy Elena Rybakına dene daıyndyǵy boıynsha bapker, ıtalııalyq Aldo Kıarımen jumys isteýdi bastady.

Bul týraly tennısshi Instagram áleýmettik jelisindegi paraqshasynyń storızine birlesken jattyǵýdaǵy beınetaspasyn júktep, «Komandaǵa qosh keldiń», — dep jazdy.

Aldo Kıarı budan buryn ataqty serbııalyq tennısshi Novak Djokovıchtiń, sondaı-aq álemniń 1-raketkasy, ıtalııalyq ıAnnık Sınnerdiń komandasynda jumys istegen. 

E.Rybakına Aýstralııanyń Brısben qalasynda Qazaqstan quramasy sapynda Bıllı Djın Kıng kýbogynyń irikteý týrnırinde óner kórsetýine baılanysty Shtýtgart (Germanııa) WTA 500 jarysynan shet qalǵan edi. Sol sebepti ótken jylǵy chempıondyq ataǵyn qorǵaı almaı, 500 reıtıngilik upaıynan aıyryldy.

Qazirgi kezde WTA Live reıtıngisinde qazaqstandyq tennısshi TOP-10-nan shyǵyp, 11-orynǵa yǵysyp tur.

Degenmen E.Rybakına 22 sáýir — 3 mamyr aralyǵynda ótetin Madrıd (Ispanııa) WTA 1000 týrnırine qatysýshylar tizimine endi. Munda ol ótken jyly jartylaı fınalǵa deıin jetken bolatyn. Sondyqtan Madrıdte reıtıngilik upaıyn joǵaltpaý úshin bıyl jartylaı fınalǵa deıin jetýi kerek.

Eske sala keteıik, budan buryn Elena Rybakınanyń Qazaqstan quramasy Bıllı Djın Kıng kýbogynyń fınaldyq kezeńine shyqqanyn jazǵan bolatynbyz.