Elena Rybakınanyń búgingi matchynda rekordtyq jaǵdaı tirkeldi

MELЬBÝRN. KAZINFORM — Aýstralııa ashyq chempıonatynda qazaqstandyq Elena Rybakına men reseılik Anna Blınkovanyń matchynda rekordtyq derek tirkeldi.

Jarty saǵattan astam ýaqytqa sozylǵan sheshýshi taı-breık 22:20 esebimen (42 upaı) reseılik tennısshiniń paıdasyna aıaqtaldy.

Bul — jekeleı synda «Úlken dýlyǵa» týrnırlerinde eń uzaqqa sozylǵan taı-breık.

Budan burynǵy rekord 38 upaı bolatyn.

2007 jyly Australian Open týrnırinde frantsııalyq Jo-Vılfrıd Tsonga ulybrıtanııalyq Endı Rodıkti birinshi settegi taı-breıkte 20:18 esebimen utqan edi.

Sondaı-aq ýkraınalyq Lesıa Tsýrenko ótken jyly Ýımbldonda rýmynııalyq Ana Bogdandy úshinshi partııada dál osyndaı eseppen jeńip, atalmysh kórsetkishti qaıtalaǵan bolatyn.

Aýstralııa ashyq chempıonatynyń ekinshi aınalymynan asa almaǵan E.Rybakına WTA Live reıtıngisinde qazirgi sátte 3-ten 5-orynǵa túsip qaldy.

Eske sala keteıik, budan buryn Aýstralııa chempıonatynda Elena Rybakınanyń asa tartysty matchta ese jibergenin jazǵan bolatynbyz.