Elena Rybakına álemniń birinshi raketkasy atanýy múmkin be
ASTANA. KAZINFORM — AQSh-ta áıelder arasynda ótip jatqan Tsıntsınnatı WTA 1000 týrnırinde kútpegen nátıje tirkeldi.
«Úlken dýlyǵa» týrnıriniń tórt dúrkin chempıony, álemniń 1-raketkasy, Belarýs ókili Arına Sobolenko tórtinshi aınalymda reıtıngide 35-oryndaǵy chehııalyq, 20 jastaǵy Sara Beılekten jeńilip qaldy — 6:7 (7:9), 4:6.
Osylaısha, A.Sobolenko ótken jylǵy upaıyn qorǵaı almady. Ol 2025 jyly Tsıntsınnatıde shırek fınalǵa deıin jetip, Elena Rybakınaǵa jol bergen edi. Al qazaqstandyq tennısshi jartylaı fınalda Polsha ókili Iga Shventekten asa almaǵan bolatyn.
Qazirgi kezde WTA Live reıtıngisinde A.Sobolenkonyń enshisinde 8 575 upaı bar. Upaı aıyrmashylyǵyn qysqartqan E.Rybakınanyń kórsetkishi — 8 141.
Eger Tsıntsınnatıde qazaqstandyq tennısshi fınalǵa deıin jetetin bolsa, onda álemdik reıtıngide kósh bastaıdy.
Alaıda bul Elena Rybakınaǵa ońaıǵa túspeıdi. Ol shırek fınalda álemniń 5-raketkasy, polıak qyzy, «Úlken dýlyǵa» týrnıriniń bes dúrkin chempıony Iga Shventekpen synǵa túsedi. Bul match 21 tamyz kúngi Qazaqstan ýaqytymen tańǵy saǵat 04.00-ge belgilengen.
Kúni búgin psıhologııalyq basymdyq I.Shventekte deýge bolady. Óıtkeni bir apta buryn Toronto (Kanada) WTA 1000 jarysynyń fınalynda polıak tennısshisi asa bir qarsylyq kórmeı, 6:2, 6:3 esebimen jeńdi. Sóıtip ózara kezdesýlerde 7:6 esebimen alǵa shyqty.
I.Shventekten ótken jaǵdaıda E.Rybakınaǵa amerıkalyqtar, álemniń 3-raketkasy Djessıka Pegýla men reıtıngide úzdik ondyqqa kiretin Amanda Anısımovanyń bireýi tap keledi. Bular da ońaı shaǵylatyn jańǵaq emes.
Eger E.Rybakına Tsıntsınnatı dodasynyń qorytyndysymen kózdegen nátıjesine qol jetkize almasa, onda 30 tamyz — 13 qyrkúıek aralyǵynda ótetin AQSh ashyq chempıonatyn kútýge týra keledi. E.Rybakına ótken jyly tórtinshi aınalymda toqtasa, A.Sobolenko chempıondyq ataǵyn qorǵaýy tıis.
Eske sala keteıik, budan buryn Tsıntsınnatı masters týrnırinde Elena Rybakınanyń shırek fınalda Iga Shventekpen oınaıtynyn jazǵan edik.
