Elena Rybakına jyldyń qorytyndy týrnırine joldama aldy

ASTANA. KAZINFORM — Qazaqstannyń birinshi, álemniń 7-raketkasy Elena Rybakına Tokıo (Japonııa) WTA 500 týrnıriniń jartylaı fınalyna shyqty. 

Jarystyń 2-raketkasy bolyp tirkelgen qazaqstandyq tennısshi shırek fınalda reıtıngide 23-orynda turǵan kanadalyq, 19 jastaǵy Vıktorııa Mbokomen betpe-bet keldi.

Elena Rybakına úshin bul matchtyń mańyzy zor edi. Osy kezdesýde utsa, ol qarasha aıynda Er-Rııadta ótetin jyldyń qorytyndy týrnırine joldama alatyn edi.

Birinshi partııada Elena 6:3 esebimen basymdylyq tanytty.

Ekinshi sette taı-breıkte Elena Rybakına esesin jibermedi — 7:6 (7:4).

Bir saǵat 26 mınýtqa sozylǵan básekede Rybakına 4 eıspen birge 3 breık-poınttyń bireýin paıdalandy. Mboko 2 eıspen shekteldi.

Osylaısha, qazaqstandyq tennısshi WTA chempıondyq kestesinde reseılik Mırra Andreevany yǵystyryp, 8-orynǵa kóterildi. Sóıtip ol úzdik segiz sportshynyń qatarynda qorytyndy jarysqa joldama aldy.

Elena Rybakına fınalǵa shyǵý úshin álemniń 17-raketkasy, chehııalyq Lında Noskovamen talasady.

Eske sala keteıik, budan buryn Elena Rybakınanyń Tokıo týrnıriniń shırek fınalyna joldama alǵanyn jazǵan edik.

Sondaı-aq Býblık Vena týrnıriniń shırek fınalynda álemniń 1-raketkasymen kezdesýi múmkin ekendigi jazyldy.