Elena Rybakına jyldyń qorytyndy týrnırin uta ala ma

ASTANA. KAZINFORM — 1 qarasha kúni Er-Rııad qalasynda (Saýd Arabııasy) jyldyń eń úzdik segiz tennısshisi qatysatyn WTA qorytyndy týrnıri bastalady.

Qazaqstan tennıs federatsııasynyń baspasóz qyzmetinen málim etkenindeı, álemniń 6-raketkasy Elena Rybakına qazir babynda.

Bıylǵy AQSh ashyq chempıonatynan keıin qazaqstandyq tennısshi 11 matchtyń toǵyzyn jeńispen aıaqtady. Tokıo WTA 500 týrnıriniń jartylaı fınaldyq básekesin ol arqasyndaǵy jaraqatyna baılanysty ótkize almady. Degenmen kúni búgin qalpyna keldi.

2025 jyly Rybakına Strasbýrg jáne Nınbo WTA 500 týrnırlerinde jeńimpaz atandy. Bul oǵan úzdikter qataryna qosylýǵa múmkindik berdi.

E.Rybakına qorytyndy jarysqa osymen úshinshi ret qatysqaly otyr. 2023 jáne 2024 jyldary ol pleı-off kezeńine shyǵa almaǵanymen, joǵary oıyn órnegin kórsete bildi. Tennısshi endi bedeli jóninen tek «Úlken dýlyǵa» dodalaryna jol beretin fınaldyq kezeńde tıtýlǵa qol jetkizý úshin baryn salmaq.

Serena Ýılıamstyń tobyna túsken Elena Rybakına senbi kúni alǵashqy oıynyn álemniń 4-raketkasy, amerıkalyq Amanda Anısımovamen ótkizedi. Bul báseke tartysty bolǵaly tur. Qos tennısshi de dopty jaqsy beredi ári batyl oınaǵandy jaqsy kóredi.

Rybakına men Anısımova 2017 jyly bir-aq ret kezdesken. Jasóspirimder arasynda Frantsııa ashyq chempıonatynda Elena 7:6 (9:7), 6:4 esebimen jeńiske jetken. S.Ýılıams tobynda Rybakına men Anısımovadan basqa álemniń 2-raketkasy, Polsha ókili Iga Shventek pen reıtıngide 7-oryndaǵy amerıkalyq Medıson Kız bar.

Eske sala keteıik, budan buryn Elena Rybakınanyń WTA qorytyndy týrnırindegi qarsylastary anyqtalǵanyn jazǵan bolatynbyz. Sondaı-aq Aleksandr Býblık alǵash ret Parıj masters týrnıriniń shırek fınalyna ótti.