Elena Rybakına jeńisti jolyn Dohada jalǵastyra ala ma

ASTANA. KAZINFORM — Qatarda 8-14 aqpan aralyǵynda Doha WTA 1000 týrnıri ótedi.

Aıtýly jarysta Qazaqstannyń birinshi, álemniń 3-raketkasy Elena Rybakına baq synaıdy.

Jarystyń 2-raketkasy bolyp tirkelgen qazaqstandyq tennısshi dodany ekinshi aınalymnan bastaıdy. Ol álemniń 33-raketkasy, qytaılyq Van Sınıýı nemese reıtıngide 46-oryndaǵy kolýmbııalyq Emılıana Arangonyń qaı jeńgenimen kezdesedi.

Dohadaǵy júlde qory 4 mln 88,211 myń AQSh dollaryna baǵalanǵan. Jeńimpaz 665 myń dollarǵa qosa 1 myń reıtıngilik upaıǵa ıe bolady.

Ótken jyly munda álemniń 4-raketkasy, amerıkalyq Amanda Anısımova úzdik shyqqan bolatyn. Ol fınalda latvııalyq Elena Ostapenkony 6:4, 6:3 esebimen jeńgen edi.

Bıyl álemdik reıtıngide ekinshi orynda turǵan Polsha ókili Iga Shventek týrnırdiń 1-raketkasy retinde synǵa túsedi. Ótken jyly E.Rybakına shırek fınalda I.Shventekten 2:6, 5:7 esebimen utylyp qalǵan. Bul joly ekeýi de jarys favorıtteri retinde qarastyrylyp otyr. Olar bári sátti bolsa, tek fınalda joldary túıisedi. Osyǵan deıin qarsylastar 12 ret kezdesken. Esep teń — 6:6. Degenmen sońǵy eki oıynda qazaqstandyq tennısshi basym túsken. Ótken jyldyń qorytyndy týrnıri men bıylǵy Aýstralııa ashyq chempıonatynda E.Rybakına myqtylyǵyn dáleldegen.

Aýstralııa chempıonatyndaǵy tıtýlynan keıin E.Rybakına jeńisti jolyn jalǵastyra ala ma, ony osy Doha korty kórsetedi.

Qazaqstannyń erler arasynda birinshi, álemniń 10-raketkasy Aleksandr Býblık 9-15 aqpan aralyǵynda ótetin Rotterdam (Nıderland) ATP 500 týrnırinde oınaıdy. Onyń alǵashqy qarsylasy osal emes, álemniń 52-raketkasy, polıak Hýbert Hýrkach.

Bul jarystyń da júlde qory qomaqty — 2 mln 462 myń 660 eýro.

Ótken jylǵy chempıon, álemniń 1-raketkasy, ıspanııalyq, Aýstralııa ashyq chempıonatynyń bıylǵy jeńimpazy Karlos Alkaras bul joly qatyspaıdy.

Eske sala keteıik, budan buryn Devıs kýbogynda Qazaqstannyń Monako quramasyna ese jibergenin jazǵan edik.