Elena Rybakına WTA Live reıtıngisinde alǵash ret ekinshi orynǵa kóterildi

ASTANA. KAZINFORM – Qazaqstannyń birinshi raketkasy Elena Rybakınanyń WTA Live reıtıngisindegi orny ózgerdi.

Indıan-Ýells týrnıriniń jartylaı fınalyna shyqqannan keıin qazaqstandyq tennısshi qazirgi kezde 7 523 upaımen Polsha ókili Iga Shventekti basyp ozyp, ekinshi orynǵa kóterildi.

Shırek fınalda ýkraınalyq Elına Svıtolınadan utylyp qalǵan I.Shventek 7 413 upaımen úshinshi satyǵa túsip qaldy.

Belorýssııalyq Arına Sobolenko 10 415 upaımen burynǵysha kósh bastap tur.

Indıan-Ýells masters jarysynyń qorytyndysyna sáıkes upaılar sany áli ózgerýi múmkin. Ol qalǵan oıyndardyń nátıjesine baılanysty. Degenmen dúısenbide jańartylatyn WTA reıtıngisinde E.Rybakınanyń ekinshi orynǵa shyǵatyny anyq. Bul onyń sporttyq jolyndaǵy eń úzdik, rekordtyq kórsetkishi bolmaq.

Qazaqstandyq tennısshiniń bıylǵy maqsaty – álemniń birinshi raketkasy ataný.

Eske sala keteıik, budan buryn Bıllı Djın Kıng kýbogynda Qazaqstan men Kanada quramalarynda kimder oınaıtynyn jazǵan bolatynbyz.

Sondaı-aq Anna Danılına Indıan-Ýells týrnıriniń fınalyna shyqty.

Elena Rybakına Indıan-Ýells týrnıriniń jartylaı fınalyna joldama aldy.