Elena Rybakına WTA qorytyndy týrnıri qarsańynda jankúıerlerge sóz arnady
ASTANA. KAZINFORM — Qazaqstannyń jáne álemniń birinshi raketkasy Elena Rybakına kórermenderdi WTA qorytyndy týrnıriniń oıyndaryn kórýge shaqyrdy.
Tennısshi Instagram áleýmettik jelisindegi Tennis Channel paraqshasynda jankúıerlerge sóz arnady.
— Barlyǵyńyzǵa sálem! Men munda, Indıan-Ýellste bolǵanyma óte qýanyshtymyn. Bizdiń oıynymyzdy qaraýǵa kelip, maýsymnyń sońǵy tennıs aptasyn tamashalańyz. Árıne, meni jyl boıy qoldaǵan barlyq jankúıerlerge alǵysymdy aıtamyn. Endeshe, kortta tezirek kezdeskenshe! — dedi Elena Rybakına.
Qazaqstandyq tennısshiniń 8-15 qarasha aralyǵynda ótetin WTA qorytyndy týrnırinde birinshi topta óner kórsetetini belgili.
Elena Rybakına alǵashqy matchyn 8 qarashadan 9-yna qaraǵan túni chehııalyq Lında Noskovamen ótkizedi.
Sodan keıin amerıkalyqtar Korı Gaýff pen Djessıka Pegýlaǵa kezek keledi. Amerıkalyq tennısshilerdiń óz alańynda oınaıtynyn eskersek, bul matchtar da ońaıǵa túspeıdi.
Jarys reglamentine sáıkes qatysýshylar óz tobynda bir-birimen kezdesedi. Ár toptan eki úzdik tennısshi pleı-off kezeńine joldama alady.
Ótken jyly qorytyndy dodada Elena Rybakına barlyq bes básekesin jeńispen aıaqtap, sonyń ishinde fınalda A.Sobolenkony utqan bolatyn. Bıyl sol chempıondyq ataǵyna qosa 2 myń reıtıngilik upaıyn qorǵaıdy.
Eske sala keteıik, budan buryn Jibek Qulambaevanyń juptyq synda Úndistandaǵy týrnırdiń shırek fınalyna shyqqanyn jazǵan edik.
