Elena Rybakına WTA Finals-2026 týrnırine birinshi bolyp joldama aldy
ASTANA. KAZINFORM — Álemniń birinshi raketkasy Elena Rybakına tennısshiler arasynda birinshi bolyp 2026 jylǵy WTA qorytyndy týrnırine qatysýǵa kepildik aldy.
WTA Finals-2026 týrnıri 8–15 qarasha aralyǵynda Indıan-Ýellste (AQSh) Indian Wells Tennis Garden korttarynda ótedi. Jarysqa jekeleı synda maýsymnyń úzdik segiz tennısshisi jáne segiz úzdik jup qatysady.
Rybakına sátti ótkizgen maýsymynyń nátıjesinde jekeleı synda qorytyndy týrnırge joldama alǵan alǵashqy tennısshi atandy. 2026 jyly qazaqstandyq tennısshi Australian Open jáne US Open týrnırlerinde jeńiske jetip, sondaı-aq mansabynda alǵash ret WTA álemdik reıtınginiń kóshin bastady.
Elena úshin aldaǵy WTA Finals qatarynan tórtinshi qorytyndy týrnır bolmaq. Ol alǵash ret bul jarysqa 2023 jyly qatysqan, al ótken maýsymda birde-bir matchta jeńilmeı, týrnırdiń basty júldesin ıelendi.
Osylaısha, Indıan-Ýellste Rybakına WTA Finals týrnıriniń qazirgi chempıony retinde óz ataǵyn qorǵaıdy. Jeńiske jetken jaǵdaıda ol Serena Ýılıamstan keıin WTA qorytyndy týrnırinde eki jyl qatarynan top jarǵan alǵashqy tennısshi atanady.
WTA Finals — áıelder arasyndaǵy kásibı tennıs maýsymyn qorytyndylaıtyn basty týrnırlerdiń biri. Jekeleı syndaǵy segiz qatysýshy tórt tennısshiden eki topqa bólinedi. Ár toptan úzdik eki sportshy jartylaı fınalǵa shyǵyp, keıin týrnır jeńimpazy anyqtalady.
Eske salaıyq, buǵan deıin Elena Rybakına álemniń birinshi raketkasy retinde arnaıy júlde alǵanyn jazǵanbyz.
