Elena Rybakına Vashıngton týrnıriniń fınalynan tys qaldy

ASTANA. KAZINFORM — Qazaqstannyń birinshi, álemniń 12-raketkasy Elena Rybakına Vashıngton (AQSh) WTA 500 týrnıriniń fınalyna shyǵa almady.

Jarystyń 3-raketkasy bolyp tirkelgen qazaqstandyq tennısshi jartylaı fınalda álemdik reıtıngide 36-oryndaǵy kanadalyq, 2021 jylǵy AQSh ashyq chempıonatynyń fınalısi Leıla Fernandespen betpe-bet keldi.

Qarsylastar osyǵan deıin eki ret kezdesken. 2024 jyly Elena Doha WTA 1000 týrnıriniń shırek fınalynda 6:4, 6:2 esebimen basym túsken. Alaıda kanadalyq tennısshi Tsıntsınnatıde ekinshi aınalymda 3:6, 7:6 (7:3), 6:4 esebimen ese qaıyrǵan edi.

Bul joly birinshi partııada taı-breıkte qazaqstandyq sportshy aıqyn basymdylyq tanytty – 7:6 (7:2).

Elena ekinshi sette birden 2:0 esebimen alǵa shyqty. Biraq Rybakına matchqa dop bergende, qatelikke boı aldyryp, Fernandes tarazy basyn teńestirip ketti – 5:5. Taı-breıkte Leıla sátti oınady – 7:6 (7:3).

Úshinshi, sheshýshi partııada kanadalyq tennısshi jeńisti julyp aldy – 7:6 (7:3).

Úsh saǵat 13 mınýtqa sozylǵan tartysty básekede Rybakına 17 eıspen birge 5 breık-poınttyń tek bireýin paıdalandy. Fernandes 12 eıs, 1 breıkpen (6 breık-poınt) kózge tústi.

L.Fernandes fınalda álemniń 46-raketkasy, ulybrıtanııalyq Emma Radýkaný nemese reıtıngide odan eki saty tómen turǵan reseılik Anna Kalınskaıanyń qaı jeńgenimen sheberlik baıqasady.

Taǵy bir qazaqstandyq tennısshi, álemniń 269-raketkasy Zarına Dııas Fıgera-da-Fosh (Portýgalııa) ITF W100 týrnıriniń fınalyna óte almady.

Zarına jartylaı fınalda álemdik reıtıngide 264-satydaǵy reseılik Marııa Tımofeevaǵa ese jiberdi. Degenmen Z.Dııas qazirgi kezde WTA Live reıtıngisinde 251-orynǵa kóterilip tur.

Eske sala keteıik, budan buryn Aleksandr Býblıktiń Aýstrııadaǵy jarystyń jeńimpazy atanǵanyn jazǵan edik.