Elena Rybakına Sobolenkony jeńip, US Open chempıony atandy
ASTANA. KAZINFORM — Qazaqstandyq tennısshi Elena Rybakına tarıhı kezdesýde US Open-2026 chempıony atandy. Ol fınalda Belarýs ókili Arına Sobolenkony jeńip, 5,5 mln dollar kóleminde júlde qorynyń ıegeri boldy.
Alǵashqy sette Rybakına Sobolenkony 6:4 esebimen jeńdi. Ekinshi set 7:5 esebimen Belarýs ókiliniń paıdasyna aıaqtaldy. Al sheshýshi úshinshi sette Rybakına 6:2 esebimen jeńiske jetti.
Nıý-Iorktegi jeńisi qazaqstandyq tennısshiniń WTA álemdik reıtınginde birinshi orynǵa kóterilýine jol ashty. Osylaısha, Elena Rybakına mansabynda alǵash ret álemdegi eń úzdik tennısshiler reıtıngin resmı túrde bastaıdy.
Tennısshiler kortta 2 saǵat 23 mınýt oınady. Osy ýaqyt ishinde Elena 10 eıs jasap, úsh ret qos qatelik jiberdi jáne 12 breık-poınttyń úsheýin paıdalandy. Osylaısha, Rybakına mansabynda alǵash ret US Open chempıony atandy.
Nıý-Iorktegi tıtýl Elena Rybakınanyń jekeleı synda «Úlken dýlyǵa» týrnırlerindegi úshinshi jeńisi boldy. Qazaqstandyq tennısshi bul sanattaǵy alǵashqy júldesin 2022 jyly Ýımbldonda jeńip alǵan. 2026 jyldyń basynda Rybakına Australian Open chempıony atansa, endi onyń júldeler toptamasy AQSh ashyq chempıonatynyń tıtýlymen tolyqty.
Fınalda Elena Rybakınaǵa sońǵy jyldary týrnırlerde qazaqstandyq tennısshiniń basty qarsylastarynyń birine aınalǵan Arına Sobolenko qarsy turdy.
Búgingi match kezinde kommentatorlar oıynǵa súıiktisimen birge kelgen akter Bred Pıttiń qaı tennısshige jankúıerlik etetinin boljady. Alaıda ol qazaqstandyq tennısshige qoldaý bildirip, dý qol shapalaqtaǵan kezde, teletúsindirmedegi kúmán seıildi.
Nıý-Iorktegi stadıonǵa eki tennısshiniń oıynyn tamashalaýǵa ataqty tennısshi Marııa Sharapova men aktrısa Djessıka Alba da keldi.
Marııa Sharapova jeńisten keıin qazaqstandyq tennısshini birinshi bolyp kortta quttyqtady. Ol Elenaǵa kýbokty tabystady. Osydan keıin jeńimpazdy marapattaýǵa arnalǵan resmı rásim ótti.
Aıta keteıik, amerıkalyq jýrnalıst US Open fınalynda Rybakına jeńiske jetedi dep boljaǵan edi.
Buǵan deıin Elena Rybakına jartylaı fınalda amerıkalyq Koko Gaýffty 3:6, 6:4, 6:4 esebimen jeńip, sheshýshi matchqa joldama aldy. Al Arına Sobolenko jartylaı fınalda Djessıka Pegýlany jeńdi.
Memleket basshysy tennısshi Elena Rybakınany «Álemniń birinshi raketkasy» ataǵyna ıe bolýymen quttyqtady.
