Elena Rybakına Ýımbldondaǵy qarsylasynyń myqty tustary týraly aıtty

ASTANA. KAZINFORM – Qazaqstannyń birinshi, álemniń tórtinshi raketkasy Elena Rybakına Ýımbldon týrnıriniń jartylaı fınalyndaǵy qarsylasy, reıtıngide 32-orynda turǵan chehııalyq Barbora Kreıchıkova týraly pikir bildirdi.

E.Rybakınanyń aıtýynsha, ol – óte myqty oıynshy. Ózine óte senimdi. Aldaǵy oıyn qıyn bolary sózsiz. Rybakına men Kreıchıkova osyǵan deıin 2021 jyly Aýstralııada jáne 2022 jyly Chehııada kezdesken. Hard tósenishinde ótken eki tartysty oıyn da chehııalyq tennısshiniń paıdasyna sheshilgen.

E.Rybakına ózin kógal tósenishinde jaqsy sezinetinin, dop berýdegi keıbir qıyndyqqa qaramastan, joǵary deńgeıde oınap kele jatqanyn atap ótti.

«Men, ásirese, sońǵy úsh matchta ózimdi óte jaqsy sezindim. Jaqsy óner kórsettim dep oılaımyn. Keıde dop bergende, dál túspeýi múmkin, biraq keıin qalpyna keledi. Óte senimdi oınaýdamyn», - dedi tennısshi.

Qazaqstandyq sportshy eshkim oıynyna kedergi keltire almaıtynyna, jınaqylyqtan tanbaıtynyna senim bildirdi. Elena Rybakına men Barbora Kreıchıkovanyń básekesi 11 shildege belgilengen.

«Alǵashqy soqqydan-aq oıyn qarqynyn tómendetpeý kerek. Meniń dop berýim jaqsardy. Osy artyqshylyǵym septesedi dep oılaımyn», - dedi E.Rybakına.

E.Rybakına sonymen qatar Londonda ekinshi ret jeńimpaz atanýǵa daıynsyz ba degen saýalǵa da jaýap berdi.

«Árıne, taǵy da tıtýlǵa qol jetkizgim keledi. Eki-aq match, qıyn qarsylastar qaldy. Matchtan-matchqa jaqsy kele jatyrmyn. Alda da osy betimnen taıǵym kelmeıdi», - dedi tennısshi.

Ekinshi jartylaı fınalda álemniń 7-raketkasy, ıtalııalyq ıAsmın Paolını men reıtıngide 37-satydaǵy horvatııalyq Donna Vekıch kezdesedi.

Eske sala keteıik, budan buryn Ýımbldonda Ámir Omarhanovtyń jasóspirimder arasynda 1/8 fınalǵa joldama alǵanyn jazǵan edik.

Sondaı-aq Elena Rybakına jartylaı fınalǵa shyqty.

Sonıa Jıenbaeva jasóspirimder arasynda úshinshi aınalymǵa ótti.