Elena Rybakına Ýımbldon týrnırin jeńispen bastady

LONDON. KAZINFORM — Qazaqstannyń birinshi, álemniń 4-raketkasy Elena Rybakına Ýımbldon týrnırin jeńispen bastady.

Budan eki jyl buryn osy «Úlken dýlyǵa» jarysynda chempıon atanǵan qazaqstandyq tennısshi alǵashqy aınalymda dúnıejúzilik reıtıngide 152-orynda turǵan rýmynııalyq Elena Gabrıela Rýsemen sheberlik baıqasty.

Osyǵan deıin qarsylastar eki jyl buryn Maıamıde kezdesip, onda Rybakına 6:4, 7:5 esebimen jeńiske jetken edi.

Bul joly Rýse 2:0 esebimen alǵa shyqqanymen, Elena tarazy basyn teńestirip qana qoımaı, setti óz enshisine jazdy — 6:3.

Ekinshi partııany Rybakına breıkpen bastap, esh múmkindik bergen joq — 6:1.

Bir saǵat 10 mınýtqa sozylǵan báseke barysynda qazaqstandyq sportshy 3 eıspen birge 9 breık-poınttyń beseýin paıdalandy. Rýse 2 eıs, 1 breıkpen (2 breık-poınt) shekteldi.

Elena Rybakına úshinshi aınalymǵa shyǵý úshin álemniń 72-raketkasy, germanııalyq Laýra Zıgemýndpen talasady. Ol reıtıngide 184-satydaǵy ýkraınalyq Katerına Baındldi joldan taıdyrdy — 6:4, 6:1.

Búgin kortqa ıÝlııa Pýtıntseva da shyǵady. Onyń qarsylasy — germanııalyq Anjelıka Kerber.

Eske sala keteıik, budan buryn Ýımbldonda Aleksandr Býblıktiń 32 eıs jasap, ekinshi aınalymǵa shyqqanyn jazǵan bolatynbyz.