Elena Rybakına Tsıntsınnatı týrnıriniń úshinshi aınalymyna shyqty
ASTANA. KAZINFORM — Qazaqstannyń birinshi, álemniń 2-raketkasy Elena Rybakına Tsıntsınnatı (AQSh) WTA 1000 týrnıriniń úshinshi aınalymyna joldama aldy.
Osynyń aldynda Kanadada Toronto WTA 1000 dodasynyń fınalyna deıin jetken qazaqstandyq tennısshi Tsıntsınnatıde dodany ekinshi aınalymnan bastady.
E.Rybakına álemdik reıtıngide 94-oryndaǵy amerıkalyq Teılor Taýnsendpen sheberlik baıqasty.
Buǵan deıin 2024 jyly Maıamı WTA 1000 dodasynyń úshinshi aınalymynda E.Rybakına T.Taýnsendti tartysty matchta 6:3, 6:7 (3:7), 6:4 esebimen tize búktirgen edi.
Bul joly birinshi partııada qazaqstandyq sportshy 3:0 esebimen alǵa shyǵyp, sol basymdylyǵyn saqtap qaldy — 6:3.
Ekinshi sette E.Rybakına 2:0 esebimen alǵa ketkenimen, T.Taýnsend sol boıda tarazy basyn teńestire bildi — 2:2. Esep 4:4 bolǵan mezette Elena taǵy bir breıkke qol jetkizdi — 5:4.
Aqyry matchqa dop bergende, múmkindigin múlt jibergen joq — 6:4.
Bir saǵat 18 mınýtqa sozylǵan báseke barysynda Rybakına 5 eıspen birge 4 breık-poınttyń úsheýin óz esebine jazdy. Taýnsend 4 eıs, 1 breıkpen (5 breık-poınt) kózge tústi.
Elena Rybakına tórtinshi aınalymǵa shyǵý úshin álemniń 41-raketkasy, Polsha ókili Magdalena Frenhpen talasady.
Eske sala keteıik, budan buryn Sonıa Jıenbaevanyń Ispanııadaǵy týrnırde taǵy da chempıon atanǵanyn jazǵan edik.
Sondaı-aq Asyljan Arystanbekova ekinshi ret qatarynan Astana týrnırinde top jardy.
