Elena Rybakına Toronto týrnıriniń shırek fınalyna joldama aldy
ASTANA. KAZINFORM — Qazaqstannyń birinshi, álemniń 2-raketkasy Elena Rybakına Toronto (Kanada) WTA 1000 týrnıriniń shırek fınalyna shyqty.
Qazaqstandyq tennısshi tórtinshi aınalymda álemniń 55-raketkasy, reseılik Lıýdmıla Samsonovaǵa tap keldi.
E.Rybakına úshin reseılik sportshy qolaısyz qarsylas bolyp esepteledi. Osyǵan deıin ózara alty kezdesýdiń tórteýinde L.Samsonova jeńse, sońǵy ekeýinde qazaqstandyq tennısshi basym túsken edi.
Bul joly birinshi partııada tennısshiler úsh retten breık almasty. Degenmen Rybakına taǵy bir breıkpen túıindeı bildi – 6:4.
Ekinshi sette esep 2:2 bolǵan mezette Samsonova breık jasap, sosyn sol basymdylyǵyn saqtap qaldy – 6:4.
Úshinshi, sheshýshi sette L.Samsonova qos breık jasap, 3:0 esebimen alǵa ketkenimen, Elena tarazy basyn teńestire aldy – 3:3. Sodan soń matchty jeńispen aıaqtady – 6:4.
Eki saǵat 50 mınýtqa sozylǵan tartysty básekede Rybakına 11 eıspen birge 17 breık-poınttyń jeteýin paıdalandy. Samsonova 1 eıs, 6 breıkpen (13 breık-poınt) kózge tústi.
Elena Rybakına jartylaı fınalǵa shyǵý úshin álemniń 13-raketkasy, japonııalyq Naomı Osaka nemese reıtıngide 34-oryndaǵy kanadalyq Leıla Fernandestiń qaı jeńgenimen talasady.
Ótken jyly qazaqstandyq tennısshi jartylaı fınalǵa deıin jetken edi.
Torontoda bıyl álemniń 1-raketkasy, Belarýs ókili Arına Sobolenko tórtinshi aınalymda kútpegen jerden Ekaterına Aleksandrovadan jeńilip qaldy – 6:7 (3:7), 6:4, 4:6.
Qazaqstandyq tennısshi ótken jylǵy nátıjesinen asyp tússe, A.Sobolenkomen aradaǵy upaı aıyrmashylyǵyn qysqarta alady.
Eske sala keteıik, budan buryn Sonıa Jıenbaevanyń Ispanııadaǵy týrnırde chempıon atanǵanyn jazǵan edik.
Sondaı-aq Asyljan Arystanbekova Astana týrnıriniń jeńimpazy atandy.
Damır Jalǵasbaı Astanadaǵy chellendjer jarysyn jeńispen bastady.
