Elena Rybakına Toronto týrnıriniń fınalynda ese jiberdi
ASTANA. KAZINFORM – Qazaqstannyń birinshi, álemniń 2-raketkasy Elena Rybakına Toronto (Kanada) WTA 1000 týrnıriniń fınalynda óner kórsetti.
Qazaqstandyq tennısshi sońǵy básekede kezinde álemdik reıtıngide kósh bastaǵan, qazirgi kezde 8-satydaǵy Polsha ókili, «Úlken dýlyǵa» týrnıriniń bes dúrkin chempıony Iga Shventekpen bas júldeni sarapqa saldy.
Qarsylastar osyǵan deıin 12 ret kezdesken, esep 6:6, teń edi. Bul joly chempıondyq oıyn 6:2, 6:3 esebimen Shventektiń paıdasyna sheshildi. Bir saǵat 16 mınýtqa sozylǵan matchta Rybakına 1 eıs jasaǵanymen, 2 breık-poıntty paıdalana almady. Shventek 5 breık-poınttyń tórteýin qur jibermedi.
Shventek 1 myń reıtıngilik upaıǵa qosa 1 mln astam dollar paıda tapty.
E.Rybakına 650 reıtıngilik upaımen birge 554 920 dollarǵa qol jetkizdi. Sonymen qatar qazaqstandyq tennısshi álemdik reıtıngide kósh basyndaǵy belorýssııalyq Arına Sobolenkomen aradaǵy upaı aıyrmashylyǵyn qysqartty. Kúni búgin Sobolenkonyń esebinde 8 670, Rybakınada 8 316 upaı bar.
Endi álemniń mańdaıaldy tennısshileri Tsıntsınnatı (AQSh) WTA 1000 dodasynda baq synaıdy. Ótken jyly munda da Rybakına jartylaı fınalǵa deıin jetken edi. Sol reıtıngilik upaıyn qorǵaýǵa týra keledi.
Eske sala keteıik, budan buryn Elena Rybakınanyń kambekpen Toronto týrnıriniń fınalyna shyqqanyn jazǵan edik.
