Elena Rybakına TOP-10-ǵa kiretin tennısshilermen bolǵan kezdesýde qatarynan 12 matchta jeńiske jetti

ASTANA. KAZINFORM – Qazaqstannyń birinshi raketkasy Elena Rybakına TOP-10-daǵy tennısshilermen matchtaǵy jeńis serııasyn 12-ge jetkizdi

Qazaqstandyq tennısshiniń búgin Indıan-Ýells WTA 1000 týrnıriniń jartylaı fınalynda álemniń 9-raketkasy, ýkraınalyq Elına Svıtolınany qapy qaldyrǵany belgili.

Osylaısha, E.Rybakınanyń jeńis serııasy ótken jylǵy qazan aıynda bolǵan Nınbo (Qytaı) WTA 500 jarysynan beri jalǵasyp keledi. Onda qazaqstandyq sportshy jartylaı fınalda ıtalııalyq Jasmın Paolınıdi utqan edi.

Jalpy, alǵashqy ondyqtaǵy oıynshylarmen 63 kezdesýdiń 36-synda E.Rybakına qarsylastarynan basym túsken.

OptaAce saıtynyń málimetine qaraǵanda, Elena sonymen qatar 2009 jyly WTA 1000 formatyndaǵy jarystar bastalǵannan beri Indıan-Ýells pen Maıamı týrnırleriniń fınalyna birneshe ret shyqqan tennıs tarıhyndaǵy úshinshi oıynshy atandy. Buǵan deıin mundaı nátıjege álemdik reıtınginiń burynǵy kóshbasshylary reseılik Marııa Sharapova men belorýssııalyq Vıktorııa Azarenko ǵana jetken.

Elena Rybakınanyń álemniń 1-raketkasy, belorýssııalyq Arına Sobolenkomen Indıan-Ýellstegi fınaldyq matchy Qazaqstan ýaqytymen 15 naýryz kúngi saǵat 23.00-ge belgilengen.

Búgin dál osy merzimde Qazaqstannyń juptyq syndaǵy birinshi raketkasy Anna Danılına serbııalyq Aleksandra Krýnıchpen birge sońǵy básekesin ótkizedi. Olardyń fınaldaǵy qarsylastary – chehııalyq Katerjına Sınıakova – amerıkalyq Teılor Taýnsend. Eger A.Danılına chempıon atansa, onda álemdik reıtıngide ekinshi orynǵa kóteriledi.

Eske sala keteıik, budan buryn Anna Danılınanyń Indıan-Ýells týrnıriniń fınalyna shyqqanyn jazǵan bolatynbyz.

Sondaı-aq Elena Rybakına ekinshi ret Indıan-Ýells týrnıriniń fınalyna shyqty.