Elena Rybakına Tokıo týrnıriniń shırek fınalyna joldama aldy

ASTANA. KAZINFORM — Qazaqstannyń birinshi, álemniń 7-raketkasy Elena Rybakına Tokıo (Japonııa) WTA 500 týrnıriniń shırek fınalyna shyqty.

Jarystyń 2-raketkasy bolyp tirkelgen E.Rybakına ekinshi aınalymda dúnıejúzilik reıtıngide 22-orynda turǵan kanadalyq, 2021 jylǵy AQSh chempıonatynyń fınalısi Leıla Fernandespen sheberlik baıqasty.

Qarsylastar osyǵan deıin ózara úsh ret kezdesip, sonyń ekeýinde Fernandes basym túsken edi. 

Bul joly birinshi partııa 6:4 esebimen Elenanyń paıdasyna sheshildi.

Ekinshi sette Rybakına 3:0 esebimen alǵa ketti. Aqyry matchty sátti aıaqtaı aldy — 6:3.
Bir saǵat 28 mınýtqa sozylǵan báseke barysynda E.Rybakına 6 eıspen birge 4 breık-poınttyń úsheýin múlt jibergen joq. Fernandes 1 eıs, 1 breıkpen (5 breık-poınt) kózge tústi.
Elena Rybakına jartylaı fınalǵa shyǵý úshin álemniń 23-raketkasy, taǵy bir kanadalyq Vıktorııa Mbokomen talasady.

Osylaısha, ótken aptada Nınbo (Qytaı) WTA 500 týrnırinde chempıon atanǵan qazaqstandyq tennısshi qatarynan besinshi jeńisine qol jetkizdi. 

Qarasha aıynda Er-Rııadta ótetin jyldyń qorytyndy týrnırine joldama alý úshin E.Rybakınaǵa endi bir jeńis jetip jatyr. 

Eske sala keteıik, budan buryn Anna Danılınanyń Tokıodaǵy týrnırdiń shırek fınalyna jazǵan edik.