Elena Rybakına Shtýtgart týrnıriniń eki dúrkin chempıony atandy
ASTANA. KAZINFORM – Qazaqstannyń birinshi, álemniń 2-raketkasy Elena Rybakına Shtýtgart (Germanııa) WTA 500 týrnırinde top jardy.
Jarystyń 1-raketkasy bolyp tirkelgen qazaqstandyq tennısshi WTA reıtıngisinde 12-orynda turǵan chehııalyq Karolına Mýhovamen chempıondyq ataqty sarapqa saldy.
Qarsylastar osyǵan deıin ózara úsh ret kezdesip, sonyń ekeýinde Mýhovanyń mereıi ústem bolǵan edi. Bul joly Rybakına matchty sátti bastady – 3:0. Alaıda ol setke dop bergende, múlt ketip, Mýhova tarazy basyn teńestirdi – 5:5. Degenmen Elena taǵy bir breıkpen túıindedi – 7:5.
Qazaqstandyq tennısshi ekinshi partııada qos breıkpen alǵa ketti – 5:0. Aqyry matchqa dop bergende, qatelesken joq - 6:1.
Bir saǵat 19 mınýtqa sozylǵan básekede Rybakına 3 eıspen birge 8 breık-poınttyń tórteýin óz esebine jazdy. Mýhova 2 eıs, 1 breıkpen erekshelendi. Osylaısha, E.Rybakına Shtýtgart týrnıriniń eki dúrkin chempıony atandy. Ol 2024 jyly top jarǵan edi. Ótken jyly qatyspaǵandyqtan, qazaqstandyq tennısshi Shtýtgarttaǵy jeńis serııasyn 8 matchqa jetkizdi.
Eske sala keteıik, budan buryn Elena Rybakınanyń ekinshi ret Shtýtgart týrnıriniń fınalyna shyqqanyn jazǵan bolatynbyz.
