Elena Rybakına Shtýtgart týrnırinde úzdik nátıjesin qaıtalaı ala ma
ASTANA. KAZINFORM — Qazaqstannyń birinshi, álemniń 2-raketkasy 13-19 sáýirde ótetin Shtýtgart (Germanııa) WTA 500 týrnırinde baq synaıdy. Qazaqstandyq tennısshi atalmysh jarysta 1-raketka bolyp tirkelgen.
Elena Rybakına ekinshi aınalymda álemniń 19-raketkasy, reseılik Dıana Shnaıder nemese reıtıngide 109-oryndaǵy germanııalyq Tamara Korpachtyń qaı jeńgenimen kezdesedi.
Dodanyń jalpy júlde qory 1 mln dollardan asady. Týrnır jeńimpazy sondaı-aq Porsche 911 Carrera S avtomobılin syıaqy retinde alady.
E.Rybakınanyń 2024 jyly Shtýtgartta úzdik shyqqany belgili. Al ótken jyly Qazaqstan quramasy sapynda oınaýyna baılanysty chempıondyq ataǵyn qorǵaı almaǵan bolatyn. Bıyl qazaqstandyq tennısshi álemniń 1-raketkasy atanýdy basty maqsat etip otyr.
2025 jyly munda fınalda álemniń 1-raketkasy, Belarýs ókili Arına Sobolenkony 6:4, 6:1 esebimen jeńgen latvııalyq Elena Ostapenko jeńimpaz atanǵan edi.
Bıyl A.Sobolenko Shtýtgart jarysyna qatysýdan bas tartty. Sondyqtan E.Rybakına sátti óner kórsetse, ekeýiniń arasyndaǵy upaı aıyrmashylyǵyn qysqarta alady. Qazirgi kezde A.Sobolenkonyń 11 025, E.Rybakınanyń 8 108 upaıy bar.
Eske sala keteıik, budan buryn Bıllı Djın Kıng kýbogynda Qazaqstan quramasynyń fınaldyq kezeńge joldama alǵanyn jazǵan bolatynbyz.
