Elena Rybakına resmı túrde álemniń birinshi raketkasy atandy
ASTANA. KAZINFORM - Qazaqstannyń áıelder arasyndaǵy jekeleı syndaǵy birinshi raketkasy Elena Rybakına Áıelder tennısi qaýymdastyǵynyń (WTA) álemdik reıtınginde resmı túrde kósh bastady, dep habarlaıdy Qazaqstan tennıs federatsııasynyń baspasóz qyzmeti.
Reıtıng jańartylǵannan keıin qazaqstandyq tennısshiniń enshisinde 9 901 upaı bar. Rybakına ekinshi orynnan birinshi orynǵa kóterilip, 7 875 upaımen ekinshi satyda turǵan Arına Sobolenkodan ozdy. Tennısshiler arasyndaǵy aıyrmashylyq 2 026 upaıdy quraıdy. Úzdik úshtikti amerıkalyq Djessıka Pegýla 7 265 upaımen túıindep tur.
Birinshi oryn úshin kúreste sheshýshi týrnır US Open-2026 boldy. Qytaılyq Chjen Tsınvendi jeńip, jartylaı fınalǵa shyǵýy Rybakınaǵa týrnırdiń keıingi nátıjelerine qaramastan álemdik reıtıngtegi kóshbasshylyqty qamtamasyz etti. US Open bastalǵan kezde birinshi orynǵa Arına Sobolenko, Djessıka Pegýla jáne Koko Gaýff ta talasqan bolatyn.
Keıin Rybakına álemniń birinshi raketkasy mártebesin ıelenip qana qoımaı, týrnırdi chempıondyq ataqpen aıaqtady. Fınalda ol Arına Sobolenkony 6:4, 5:7, 6:2 esebimen jeńdi. Bul Elenanyń US Open týrnırindegi alǵashqy jáne mansabyndaǵy «Úlken dýlyǵa» jarystaryndaǵy úshinshi tıtýly boldy.
Osylaısha, 27 jastaǵy Elena Rybakına WTA tarıhynda álemdik reıtıngtiń birinshi satysyna kóterilgen 30-shy tennısshi atandy. Sondaı-aq ol erler men áıelder arasynda jekeleı synda álemdik reıtıngti basqarǵan Qazaqstannyń tuńǵysh ókili boldy.
Aıta keteıik, Prezıdent Elena Rybakınany tennısten AQSh Ashyq chempıonatyndaǵy jeńisimen quttyqtady.
