Elena Rybakına iri jarystardaǵy vınners sany jóninen kósh bastady
ASTANA. KAZINFORM — Qazaqstannyń jáne álemniń 1-raketkasy, «Úlken dýlyǵa» týrnıriniń úsh dúrkin chempıony Elena Rybakına erekshe kórsetkishke qol jetkizdi.
OptaAce saıtynan málim etkenindeı, qazaqstandyq tennısshi bıylǵy WTA 1000 týrnırlerinde belsendi túrde utqan doptar sany jóninen kósh bastady.
Elena Rybakına barlyǵy 856 vınners jasaǵan. Sodan keıingi oryndarda latvııalyq Elena Ostapenko (825), belorýssııalyq Arına Sobolenko (733), Polsha ókili Iga Shventek (725) jáne amerıkalyq Korı Gaýff (708) keledi.
Osy aptada E.Rybakına Nınbo (Qytaı) WTA 500 jarysynda ótken jylǵy chempıondyq ataǵyn qorǵaıdy. Birden ekinshi aınalymǵa ótken onyń qarsylasy anyqtaldy.
Ózbekstandyq, túbi reseılik, reıtıngide 105-oryndaǵy Polına Kýdermetova alǵashqy aınalymda álemniń 38-raketkasy, ıspanııalyq Krıstına Býkshany 7:6 (7:5), 6:2 esebimen qapy qaldyrdy.
E.Rybakına men P.Kýdermetovanyń oıyny 22 qazanǵa belgilengen.
Álemniń burynǵy birinshi, qazirgi 9-raketkasy I.Shventek jaraqatyna baılanysty Nınbo dodasyna qatysýdan bas tartty. Keıin bıylǵy maýsymdy merziminen buryn aıaqtaıtynyn málimdedi.
Osylaısha, polıak tennısshisi 7-14 qarashada ótetin WTA qorytyndy týrnırine qatysýdan úmitin úzdi.
Kúni búgin qorytyndy jarysta baq synaıtyn Elena Rybakına bastaǵan jeti tennısshi belgili. Qalǵan bir joldamany chehııalyq Karolına Mýhova men ýkraınalyq Marta Kostıýk sarapqa salady.
Eske sala keteıik, budan buryn Mıhaıl Kýkýshkınniń Almatydaǵy sońǵy jarysyn jeńispen bastaǵanyn jazǵan edik.
Sondaı-aq Almaty týrnırinde Býblık pen Nurlanuly alǵash ret birge óner kórsetti.
Ǵaısaǵalı Seıtaq
