Elena Rybakına: Parıj Olımpıadasynda jekeleı synǵa kúsh salamyn

PARIJ. KAZINFORM – Qazaqstannyń birinshi, álemniń 4-raketkasy Elena Rybakına Parıj Olımpıadasynda Aleksandr Býblıkpen mıkste óner kórsetý múmkindigi men Rolan Garros týrnırinde shırek fınaldan ne kútetini jóninde áńgimelep berdi.

Qazaqstandyq tennısshi shırek fınaldaǵy qarsylasy Italııa ókili ıAsmıne Paolınıdiń ońaı shaǵylatyn jańǵaq emestigin málimdedi.

«Sońǵy ret biz Shtýtgartta oınadyq, match úsh setke sozyldy. Men alǵa shyqqanymmen, ol jaqsy qımyldap, dopty qatty soǵyp, qaıtaryp otyrdy. Aıaqpen jıi jumys isteýge týra keledi. Biz bir-birimizdi jaqsy bilemiz, ol myqty oınaıdy. Elınamen ótken match ta aýyr boldy. Kóremiz», - dedi E.Rybakına baspasóz máslıhatynda.

– Olımpıadada Býblıkpen birge oınaǵyńyz keledi me? Ol jóninde ne aıtar edińiz?

– Sashamen birge jattyǵyp, oınaý árqashanda kóńildi. Mıkst jóninde ázirge aıta almaımyn. Anyǵy, Parıj Olımpıadasynda jekeleı synda óner kórsetýge kúsh salamyn. Sosyn juptyq synda oınaımyz ba, aqyldasatyn bolamyz.

– Frantsııa ashyq chempıonatynda top jaramyn dep oılaısyz ba?

– Árıne, qashanda jeńis – basty maqsat. Biraq qazir men árbir kelesi matchqa daıyndalamyn. ıAsmıne tórtinshi aınalymda utqannan keıin endigi nazar aldaǵy oıynda. Óte jaqsy oınap júrmin dep aıta alamyn. Uıqyǵa jáne densaýlyǵyma baılanysty alańdaýshylyq boldy. Sońǵy aptada dene daıyndyǵy men salmaǵymda azdaǵan joǵaltý boldy. Degenmen ózimdi tamasha sezinemin. Oıyndardy eki setpen bitirip kele jatqanyma qýanyshtymyn.

– Jaqsy kóretin «Úlken dýlyǵa» týrnıri qandaı?

– Sirá, Ýımbldon bolar. Sonda eń úlken tabysyma qol jetkizdim. Stadıon lyq tolsa, qaı «Úlken dýlyǵa» jarysy da kúshti ǵoı, degenmen men balalyq shaǵymnan Ýımbldondy armandadym.

Eske sala keteıik, budan buryn Rolan Garros týrnırinde Rybakınanyń Tokıoda ketken eseni qaıtaryp, shırek fınalǵa shyqqanyn jazǵan bolatynbyz.

Jas tennısshi Ámir Omarhanov Rolan Garrostyń ekinshi aınalymyna shyqty.