Elena Rybakına Monreal týrnıriniń jartylaı fınalyna ótti

ASTANA. KAZINFORM — Qazaqstannyń birinshi, álemniń 12-raketkasy Elena Rybakına Monreal (Kanada) WTA 1000 týrnıriniń jartylaı fınalyna joldama aldy.

Qazaqstandyq tennısshi shırek fınalda álemniń 28-raketkasy, ýkraınalyq Marta Kostıýkpen betpe-bet keldi.

Osyǵan deıin qarsylastar úsh ret kezdesip, sonyń ekeýinde Elena jeńgen edi.

Bul joly birinshi partııada Rybakına aıqyn basymdylyq tanytty – 6:1.

Ekinshi sette esep 2:1 bolǵan mezette Kostıýk matchty jalǵastyrýdan bas tartty.

Nebári 53 mınýtqa sozylǵan básekede Rybakına eıs jasamaǵanymen, 10 breık-poınttyń úsheýin paıdalanyp úlgerdi.

Elena Rybakına fınalǵa shyǵý úshin álemniń 85-raketkasy, 18 jastaǵy kanadalyq Vıktorııa Mbokomen talasady. Ol shırek fınalda reıtıngide 51-oryndaǵy ıspanııalyq Djessıka Býzas Maneırony qapy qaldyrdy – 6:4, 6:2.

Qazaqstandyq sportshy 24 shildede Vashıngtonda V.Mbokony 6:3, 7:5 esebimen utqan edi.

Eske sala keteıik, budan buryn Germanııadaǵy jarysta Skatovtyń Popkony utyp, kelesi aınalymǵa shyqqanyn jazǵan bolatynbyz.