Elena Rybakına Maıamı týrnıriniń tórtinshi aınalymyna ótti
ASTANA. KAZINFORM — Qazaqstannyń birinshi, álemniń 2-raketkasy Elena Rybakına Maıamı (AQSh) WTA 1 000 týrnıriniń tórtinshi aınalymyna shyqty.
Qazaqstandyq tennısshi úshinshi aınalymda álemniń 28-raketkasy, ýkraınalyq Marta Kostıýkpen betpe-bet keldi.
Qarsylastar osyǵan deıin ózara bes márte kezdesip, sonyń tórteýinde Rybakına basym túsken edi. Sońǵy ret Indıan-Ýells masters jarysynyń úshinshi aınalymynda 6:4, 6:4 esebimen Kostıýkti utqan bolatyn.
Bul joly birinshi partııada Elena 4:1 esebimen alǵa ketip, sol basymdylyǵyn saqtap qaldy — 6:3.
Ekinshi sette esep 3:3 bolǵan mezette qazaqstandyq sportshy breık jasaı bildi — 5:3. Aqyry matchqa dop bergende, múmkindigin jibergen joq — 6:4.
Bir saǵat 22 mınýtqa sozylǵan básekede Rybakına 1 eıspen birge 10 breık-poınttyń ekeýin óz esebine jazdy. Kostıýk 3 eıs jasaǵanymen, 3 breık-poıntyn paıdalana almady.
Elena Rybakına shırek fınalǵa shyǵý úshin reıtıngide 68-oryndaǵy aýstralııalyq Talııa Gıbsonmen talasady. Ol úshinshi aınalymda álemniń 17-raketkasy, 18 jastaǵy amerıkalyq Iva Iovıchti aıqyn basymdylyqpen jeńdi — 6:2, 6:2.
E.Rybakına Maıamıde 2023 jáne 2024 jyldary fınalǵa deıin jetken edi.
Eske sala keteıik, budan buryn Maıamı týrnırinde sensatsııa jasaǵan Aleksandr Shevchenkonyń álemniń 9-raketkasyn jeńgenin jazǵan bolatynbyz.
Sondaı-aq Ámir Omarhanov Týnıstegi týrnırde úzdik shyqty.
