Elena Rybakına Maıamı týrnıriniń shırek fınalyna shyqty

ASTANA. KAZINFORM — Qazaqstannyń birinshi, álemniń 2-raketkasy Elena Rybakına Maıamı (AQSh) WTA 1 000 týrnıriniń shırek fınalyna joldama aldy.

Qazaqstandyq tennısshi tórtinshi aınalymda álemdik reıtıngide 68-oryndaǵy aýstralııalyq, 21 jastaǵy Talııa Gıbsonmen alańǵa shyqty.

Bul qos sportshynyń ózara alǵashqy kezdesýi edi. Sońǵy kezde erekshe jarqyraı kóringen Talııa Gıbson osy Maıamı dodasynyń barysynda TOP-20-ǵa kiretin japonııalyq Naomı Osaka men amerıkalyq Iva Iovıchti utyp, sensatsııa jasaǵan edi. 

Birinshi partııada Elena qos breıkke qol jetkizdi — 6:2.

Ekinshi sette esep 2:2 bolǵan mezette Rybakına taǵy da breıkpen alǵa ketti. Taǵy bir breık — 5:2. Aqyry matchty eıspen túıindedi — 6:2. 

Bir saǵat 5 mınýtqa sozylǵan básekede Rybakına 7 eıspen birge 7 breık-poınttyń tórteýin óz esebine jazdy. Gıbson bir eıs jasaǵanymen, bir breık-poıntty paıdalana almady. 

Elena Rybakına jartylaı fınalǵa shyǵý úshin álemniń 5-raketkasy, amerıkalyq Djessıka Pegýlamen talasady. Ol tórtinshi aınalymda reıtıngide 36-satydaǵy rýmynııalyq Jaklın Krıstıandy joldan taıdyrdy — 6:4, 6:1. 

E. Rybakına osynyń aldynda Indıan-Ýells (AQSh) masters jarysynyń shırek fınalynda D. Pegýlany 6:1, 7:6 (7:4) esebimen jeńgen edi. 

Eske sala keteıik, budan buryn Elena Rybakınanyń Maıamı masters týrnıriniń tórtinshi aınalymyna ótkenin jazǵan bolatynbyz.