Elena Rybakına Maıamı týrnırinen keıin erekshe nátıjege qol jetkizdi

ASTANA. KAZINFORM – Maıamı (AQSh) WTA 1 000 týrnıriniń jartylaı fınalyna shyqqan Qazaqstannyń birinshi, álemniń 2-raketkasy Elena Rybakına rekord ornatty.

Qazaqstandyq tennısshi sporttyq jolynda WTA 1000 jarystarynda 13 ret jartylaı fınalǵa joldama aldy.

Osylaısha, E.Rybakına Azııa elderi boıynsha úzdik kórsetkishti jańartty. 2009 jyly WTA 1000 dodasy bastalǵannan beri qytaılyq Lı Na buǵan deıin 12 ret jartylaı fınalǵa shyqqan edi.

Sonymen qatar qazaqstandyq sportshy 2009 jyldan beri Indıan-Ýells pen Maıamıde birneshe maýsym qatarynan jartylaı fınalǵa ótken úshinshi tennısshi atandy. Sóıtip, ol reseılik Marııa Sharapova men belarýstik Vıktorııa Azarenkonyń jetistigin qaıtalady.

Oǵan qosa amerıkalyq Djessıka Pegýlamen ótken shırek fınaldyq matchta Elena 15 eıs jasady. Bul da – osy dodadaǵy bıylǵy ozyq kórsetkish.

Elena Rybakına fınalǵa shyǵý úshin Maıamı týrnıriniń ótken jylǵy chempıony, álemniń 1-raketkasy, Belarýs ókili Arına Sobolenkomen talasady.

Qarsylastar osyǵan deıin 16 ret kezdesken. Esep – 9:7, Sobolenkonyń paıdasynda.

Bıyl Aýstralııa ashyq chempıonatynyń fınalynda Rybakına jeńse, keıin Indıan-Ýellste Sobolenko qarymta qaıyrdy.

E.Rybakına WTA Live reıtıngisinde qazirgi kezde upaı sanyn 8 108-ge jetkizdi. Kósh basyndaǵy A.Sobolenkonyń enshisinde 10 415 upaı bar.

Eske sala keteıik, budan buryn Maıamı týrnırinde Elena Rybakınanyń kambekpen jartylaı fınalǵa shyqqanyn jazǵan bolatynbyz.