Elena Rybakına Maıamı týrnırinde jarys jolynan shyǵyp qaldy

ASTANA. KAZINFORM — Qazaqstannyń birinshi, álemniń 8-raketkasy Elena Rybakına Maıamı (AQSh) WTA 1000 týrnıriniń úshinshi aınalymyna óte almady.

Qazaqstandyq tennısshi tartysty matchta álemniń 40-raketkasy, 20 jastaǵy Eshlın Krıýgerge jol berdi — 4:6, 6:2, 4:6.

Bir saǵat 52 mınýtqa sozylǵan báseke barysynda Rybakına 5 eıspen birge 4 breık-poınttyń ekeýin paıdalandy. Krıýger 4 eıs, 2 breıkpen (3 breık-poınt) kózge tústi.

Buǵan deıin E.Rybakına eki jyl qatarynan Maıamı týrnıriniń fınalyna shyqqan edi. Bıyl sol nátıjesin qaıtalaı almaı, reıtıngilik upaıynan aıyryldy.

Onyń sáýir aıynda Shtýtgart (Germanııa) WTA 500 dodasyna qatyspaıtynyn eskersek, úzdik ondyqtan shyǵyp qalý qaýpi tónip tur.

Eske sala keteıik, budan buryn Rybakınanyń Qazaqstan namysyn qorǵaý úshin ózi chempıon bolǵan jarysqa qatyspaıtynyn jazǵan edik.