Elena Rybakına Qytaıdaǵy týrnırdiń jartylaı fınalyna joldama aldy

ASTANA. KAZINFORM — Qazaqstannyń birinshi, álemniń 9-raketkasy Elena Rybakına Nınbo (Qytaı) WTA 500 týrnıriniń jartylaı fınalyna shyqty. 

Jarystyń 3-raketkasy bolyp tirkelgen Rybakına shırek fınalda reıtıngide 104-oryndaǵy aýstralııalyq Aıla Tomlıanovıchpen sheberlik baıqasty.

Osyǵan deıin ózara kezdesýleriniń sońǵy ekeýinde Elena jeńiske jetken edi. Bul joly Rybakına birinshi partııada aıqyn basymdylyq tanytty - 6:2. Ekinshi sette tipti bet qaratqan joq - 6:0.

Bir saǵatqa jetpeıtin ýaqyt ishinde Elena 7 eıspen birge 12 breık-poınttyń teń jartysyn paıdalandy. Tomlıanovıch 1 breıkpen shekteldi.

Elena fınalǵa shyǵý úshin álemniń 8-raketkasy, ıtalııalyq Jasmın Paolınımen talasady. Ol reıtıngide 14-oryndaǵy shveıtsarııalyq Belında Benchıchti joldan taıdyrdy – 5:7, 7:5, 6:3.

Qazaqstannyń juptyq syndaǵy birinshi, álemniń 13-raketkasy Anna Danılına serbııalyq Aleksandra Krýnıchpen birge jartylaı fınaldan tys qaldy. Olar shırek fınalda amerıkalyq Nıkol Melıchar-Martınez — reseılik Lıýdmıla Samsonovaǵa jol berdi – 5:7, 1:6.

Eske sala keteıik, budan buryn Elena Rybakınanyń Qytaıdaǵy jarystyń shırek fınalyna ótkenin jazǵan edik. 

Sondaı-aq Qazaqstan tennıstiń damýy jóninen álemdegi úzdik 10 eldiń qataryna kirdi.