Elena Rybakına Qytaıdaǵy týrnırde úzdik shyqty

ASTANA. KAZINFORM — Qazaqstannyń birinshi, álemniń 9-raketkasy Elena Rybakına Nınbo (Qytaı) WTA 500 týrnıriniń chempıony atandy.

Qazaqstandyq tennısshi fınalda álemniń 10-raketkasy, reseılik Ekaterına Aleksandrovamen chempıondyq ataqty sarapqa saldy.

Osyǵan deıin qarsylastar tórt ret kezdesip, sonyń úsheýinde E.Aleksandrova basym túsken edi.
Bul joly birinshi partııa reseılik sportshynyń paıdasyna sheshildi – 6:3.

Ekinshi sette Rybakına bet qaratpady – 6:0. Sodan keıin úshinshi sette 3:0 esebimen alǵa shyqty.

Báseke barysynda Elena qatarynan toǵyz geımdi óz esebine jazdy. Aqyry matchty breıkpen bitirdi – 6:2.

Bir saǵat 58 mınýtqa sozylǵan básekede Rybakına 11 eıspen birge 10 breık-poınttyń teń jartysyn paıdalandy. Aleksandrova 2 eıs, 1 breıkpen (3 breık-poınt) kózge tústi.

Osylaısha, E.Rybakına bıyl ekinshi tıtýlyna qol jetkizdi. Budan buryn ol Strasbýrg (Frantsııa) WTA 500 jarysynda úzdik shyqqan edi.

Rybakına dúısenbi kúni bastalatyn Tokıo (Japonııa) WTA 500 dodasynda ekinshi raketka bolyp tirkelgen. Ol ekinshi aınalymda álemniń 27-raketkasy, kanadalyq Leıla Fernandes nemese reıtıngide 55-satydaǵy grekııalyq Marııa Sakkarıdiń qaı jeńgenimen kezdesedi.

Qazaqstandyq tennısshi Tokıoda jartylaı fınalǵa deıin jetse, qarasha aıynda Saýd Arabııasynyń Er-Rııad qalasynda ótetin jyldyń qorytyndy týrnırine joldama alady. 

Eske sala keteıik, budan buryn Elena Rybakınanyń Qytaıdaǵy týrnırde basty qarsylasyn jeńip, fınalǵa shyqqanyn jazǵan edik.