Elena Rybakına Qytaıdaǵy týrnırde basty qarsylasyn utyp, fınalǵa shyqty

ASTANA. KAZINFORM — Qazaqstannyń birinshi, álemniń 9-raketkasy Elena Rybakına Nınbo (Qytaı) WTA 500 týrnıriniń fınalyna shyqty.

Qazaqstandyq tennısshi jartylaı fınalda álemniń 8-raketkasy, ıtalııalyq Jasmın Paolınımen betpe-bet keldi. 

Osyǵan deıin qarsylastar bes márte kezdesip, sonyń úsheýinde Paolını jeńgen edi.

Bul matchtyń mańyzdylyǵy sol, E.Rybakınanyń jyldyń qorytyndy týrnırine joldama alýy úshin WTA chempıondyq kestesinde úzdik segizdikke iligýi qajet. Osyǵan deıin J.Paolını 4 325 upaımen jetinshi, reseılik Mırra Andreeva (4 320) segizinshi, al E.Rybakına (4 myń upaı) toǵyzynshy orynda turǵan edi. Sondyqtan sońǵy eki joldama úshin tartys osy úsh tennısshiniń arasynda bolatyny anyq-ty.

Birinshi partııada esep 4:3 bolǵan mezette E.Rybakına breık jasaı bildi – 6:3. Ekinshi sette taǵy eki breıkke qol jetkizdi – 6:2.

Saǵat jarymǵa jýyq ýaqytqa sozylǵan básekede Rybakına 10 eıspen birge 10 breık-poınttyń úsheýin múlt jibermedi. Paolını 7 breık-poınttan eshteńe shyǵara alǵan joq. 

Elena Rybakına fınalda reseılikter, álemniń 10-raketkasy Ekaterına Aleksandrova nemese reıtıngide 19-oryndaǵy Dıana Shnaıderdiń qaı jeńgenimen chempıondyq ataq úshin talasady. 

Qazaqstandyq tennısshi chempıondyq kestede upaı sanyn 4 130-ǵa jetkizdi. Endi Nınbo dodasyn tabysty aıaqtap, aldaǵy aptada Tokıo týrnırinde sátti óner kórsetse, jyldyń qorytyndy týrnırine joldama alady. 

Eske sala keteıik, budan buryn Elena Rybakınanyń Qytaıdaǵy týrnırdiń jartylaı fınalyna joldama alǵanyn jazǵan edik.