Elena Rybakına qazaqstandyq jankúıerlerge alǵys aıtty

Qazaqstannyń birinshi, álemniń 3-raketkasy Elena Rybakına qazaqstandyq jankúıerlerge alǵysyn aıtty, dep habarlaıdy Kazinform.

Qazaqstandyq tennısshi Brısben (Aýstralııa) WTA 500 týrnırinde ózin qoldaǵan barsha jankúıerge rızashylyǵyn bildirdi. 

«Barshańyzǵa, ásirese, qazaqstandyq jankúıerlerge myń alǵys. Sizderdiń habarlamalaryńyzdy oqý, álemniń túrli elderinde minbelerden jankúıerlerimdi kórý – maǵan erekshe qýanysh syılaıdy», - dep jazdy Rybakına Instagram jelisindegi paraqshasynda.

Elena Brısben jarysynyń fınalynda álemniń 2-raketkasy, Belarýs ókili Arına Sobolenkony jeńip, WTA dodalaryndaǵy altynshy tıtýlyna qol jetkizgen bolatyn.

Qazaqstandyq úzdik tennısshi osy aptada Adelaıde (Aýstralııa) WTA 500 týrnırinde baq synaıdy. Osy jarystyń 1-raketkasy bolyp tirkelgen Rybakına ekinshi aınalymda dúnıejúzilik reıtıngide 61-orynda turǵan ıspanııalyq Krıstına Býchamen sheberlik baıqasady. Ol búgin alǵashqy aınalymda álemniń 30-raketkasy, ıtalııalyq ıAsmına Paolınıdi 6:3, 6:3 esebimen qapy qaldyrdy.

Eske sala keteıik, budan buryn WTA-nyń jańartylǵan reıtınginde Elena Rybakınanyń 3, Anna Danılınanyń 44-orynǵa kóterilgenin jazǵan bolatynbyz.

Sondaı-aq Aleksandr Býblık álemdik reıtıngide TOP-30-ǵa jaqyndady.