Elena Rybakına Qazaqstan quramasyna qatysty mańyzdy málimdeme jasady
ASTANA. KAZINFORM — Qazaqstan áıelder quramasynyń kóshbasshysy ári álemniń birinshi raketkasy Elena Rybakına bıyl Bıllı Djın Kıng kýbogi aıasyndaǵy matchtarǵa qatyspaıtynyn rastady. Bul týraly Sports.kz jazdy.
Qazaqstandyq tennısshi bul sheshimin maýsymnyń sońǵy kezeńindegi joǵary qarqynnan keıin aǵzasyna demalys kerektigin, ózin qalpyna keltirý qajettiligi baryn túsindirdi. Ótken aptada Rybakına US Open-2026 týrnıriniń jeńimpazy atansa, oǵan deıin Tsıntsınnatı jarysynda jaraqat alǵan bolatyn.
— Barshańyzǵa sálem! Bıyl Bıllı Djın Kıng kýboginde óner kórsete almaıtynymdy ókinishpen habarlaımyn. Shenchjendegi týrnırge qatysa almaıtynyma qynjylyp otyrmyn. Bul — tamasha jankúıerleri bar keremet jer. Sońǵy bir aı men úshin óte aýyr boldy. Sondyqtan qazir tolyq qalpyma kelip, qaıtadan ońtaıly fızıkalyq jaǵdaıǵa túsýim kerek. Osylaısha jarys jolyna jaqsy daıyndyqpen oralǵym keledi. Qyzdarǵa sáttilik tileımin! Alǵa! — dep jazdy Rybakına Instagram Stories paraqshasynda.
Eske sala keteıik, Billie Jean King Cup týrnıriniń fınaldyq kezeńi 22-27 qyrkúıek aralyǵynda Qytaıdyń Shenchjen qalasyndaǵy Shenzhen Bay Sports Centre arenasynda ótedi. 23 qyrkúıekte Qazaqstan quramasy Ispanııamen kezdesedi.
Elena Rybakına — WTA reıtınginde álemniń birinshi raketkasy atanǵan Qazaqstannyń tarıhtaǵy tuńǵysh ókili. US Open-2026 týrnırindegi jeńisinen keıin ol resmı túrde álemdik reıtıngtiń kóshin bastady.
Eske sala keteıik, Elena Rybakına US Open-2026 týrnırindegi sátti ónerinen keıin álemdik reıtıngte birinshi orynǵa kóterildi.
Ol álemniń birinshi raketkasy retinde arnaıy júlde aldy.
Elena tennısshiler arasynda birinshi bolyp 2026 jylǵy WTA qorytyndy týrnırine qatysýǵa kepildik aldy.
Artynsha tennısshi kásibı sportshy retinde qalyptasýyna qoldaý bolǵan Qazaqstanǵa, barsha jankúıerlerine alǵys aıtqan bolatyn.
