Elena Rybakına Indıan-Ýells týrnıriniń tórtinshi aınalymyna shyqty

ASTANA. KAZINFORM — Qazaqstannyń birinshi, álemniń 7-raketkasy Elena Rybakına Indıan-Ýells (AQSh) WTA 1000 týrnıriniń tórtinshi aınalymyna joldama aldy.

Qazaqstandyq tennısshi úshinshi aınalymda álemniń 38-raketkasy, ulybrıtanııalyq Ketı Býltermen betpe-bet keldi.

Qarsylastar osyǵan deıin 2023 jyly Ýımbldon jarysynda kezdesip, onda Rybakına 6:1, 6:1 esebimen oısyrata utqan edi.

Bul joly birinshi partııada qazaqstandyq sportshy birde-bir geım bergen joq — 6:0.
Ekinshi sette esep 3:3 bolǵan mezette Elenanyń qateligin paıdalanǵan Býlter breık jasap, sosyn óz geımin alyp, alǵa ketti — 5:3. Degenmen Rybakına tarazy basyn teńestirdi — 5:5.

Sodan keıin matchty taǵy bir breıkpen túıindedi — 7:5.

Bir saǵat 16 mınýtqa sozylǵan báseke barysynda Rybakına 6 eıspen birge 9 breık-poınttyń beseýin múlt jibergen joq. Býlter 2 eıs, 1 breıkpen shekteldi.

Elena Rybakına shırek fınalǵa shyǵý úshin álemniń 11-raketkasy, reseılik Mırra Andreevamen talasady. Ol reıtıngide 21-oryndaǵy danııalyq Klara Taýsondy joldan taıdyrdy - 6:3, 6:0.

Elena Rybakına Indıan-Ýellste 2023 jyly chempıon atansa, ótken jyly densaýlyǵyna baılanysty dodadan tys qalǵan edi. 

Bıyl mundaǵy júlde qory 9 mln AQSh dollaryna jýyqtaıdy. Týrnır jeńimpazy 1,1 mln astam tabys taýyp, 1 myń reıtıngilik upaıǵa ıe bolady.

Taǵy bir qazaqstandyq ıÝlııa Pýtıntseva juptyq synda Klara Taýsonmen birge ekinshi aınalymda jarystyń 4-raketkalary, latvııalyq Elena Ostapenko — aýstralııalyq Ellen Pereske jol berdi — 6:7 (4:7), 4:6.

Eske sala keteıik, budan buryn Indıan-Ýells týrnırinde Anna Danılınanyń jarys jolynan shyǵyp qalǵanyn jazǵan bolatynbyz.