Elena Rybakına ekinshi ret Shtýtgart týrnıriniń fınalyna shyqty

Jarystyń 1-raketkasy bolyp tirkelgen qazaqstandyq tennısshi jartylaı fınalda álemdik reıtıngide 9-oryndaǵy reseılik Mırra Andreevamen sheberlik baıqasty.

Qarsylastar osyǵan deıin ózara úsh kezdesý ótkizip, sonyń sońǵy ekeýinde reseılik sportshy basym túsken. 

Bul joly birinshi partııada Rybakına 4:2 esebimen alǵa shyqqanymen, Andreeva sol boıda tarazy basyn teńestirdi — 4:4. Degenmen Elena taǵy bir breıkpen túıindedi — 7:5.

Ekinshi sette qazaqstandyq tennısshi 3:0 esebimen alǵa shyqty. Budan keıin qarqynyn tipti údetti — 6:1.

Bir saǵat 17 mınýtqa sozylǵan básekede Rybakına 7 eıspen birge 10 breık-poınttyń tórteýin qur jibergen joq. Andreeva 3 eıs, 1 breıkpen (2 breık-poınt) shekteldi. 

Elena Rybakına fınalda reıtıngide 12-oryndaǵy chehııalyq Karolına Mýhovamen chempıondyq ataqty sarapqa salady. Ol jartylaı fınalda álemniń 7-raketkasy, ýkraınalyq Elına Svıtolınany joldan taıdyrdy — 6:4, 2:6, 6:4.

Osylaısha, E.Rybakına ekinshi ret Shtýtgart týrnıriniń fınalyna shyqty. Ol 2024 jyly jeńimpaz atanǵan edi. Al ótken jyly qatyspaǵan bolatyn. 2024 jyldy qosa eseptegende, Elena Shtýtgartta qatarynan jeti matchty jeńispen aıaqtady.

Eske sala keteıik, budan buryn Shtýtgart týrnırinde Elena Rybakınanyń úsh saǵattyq kezdesýin jeńispen túıindegenin jazǵan bolatynbyz.