Elena Rybakına Dýbaıda 13 eıs jasap, shırek fınalǵa shyqty

DÝBAI. KAZINFORM – Qazaqstannyń birinshi, álemniń 4-raketkasy Elena Rybakına Dýbaı WTA 1000 týrnıriniń shırek fınalyna shyqty. 

Qazaqstandyq tennısshi úshinshi aınalymda dúnıejúzilik reıtıngide 53-orynda turǵan Polsha ókili Magdalena Frenhpen sheberlik baıqasty.

Osyǵan deıin qarsylastar 2018 jyly Taıbeıdegi týrnırde kezdesip, onda E.Rybakına 6:3, 6:4 esebimen basym túsken edi.

Bul joly birinshi partııada esep 3:3 bolǵan mezette polıak sportshysy breık jasap ketti. Degenmen ol setke dop bergende, Elena tarazy basyn teńestirdi – 5:5. Taı-breıkte 2:5 esebimen utylyp jatyp, qatarynan bes dopty óz esebine jazdy – 7:6 (7:5).

Ekinshi setti M.Frenh breıkpen bastady – 3:0. Budan keıin Rybakına esepti qysqartqanymen, qarsylasynyń qaıta basymdylyq alýyna múmkindik berip qoıdy – 2:4. Aqyry partııa Frenhtiń enshisinde ketti – 6:3.

Úshinshi, sheshýshi partııada esep 5:4 bolǵan kezde Rybakına breık jasaı aldy – 6:4.

Tartysty ótip, 2 saǵat 39 mınýtqa sozylǵan báseke barysynda E.Rybakına 13 eıs jasap, 8 breık-poınttyń úsheýin paıdalandy. M.Frenh 3 eıs, 3 breıkpen (9 breık-poınt) kózge tústi.

Elena Rybakına júlde qory 3,2 mln AQSh dollarynan asatyn dodanyń jartylaı fınalyna shyǵý úshin álemniń 26-raketkasy, ıtalııalyq ıAsmına Paolınımen talasady. Ol úshinshi aınalymda kútpegen jerden álemniń 11-raketkasy, grekııalyq Marııa Sakkarıdi joldan taıdyrdy – 6:4, 6:2.

E.Rybakına ótken jyly Dýbaı dodasynda úshinshi aınalymnan asa almaǵan edi.

Taǵy bir qazaqstandyq, juptyq synda reıtıngide 47-oryndaǵy Anna Danılına Dýbaıda qytaılyq Shýaı Chjanmen birge shırek fınalǵa shyǵa almady. Olar jarystyń 2-raketkalary, kanadalyq Gabrıela Dabrovskı - jańa zelandııalyq Erın Rýtlıfke jol berdi – 7:5, 2:6, 6:10.

Eske sala keteıik, budan buryn Elena Rybakınanyń Dýbaı WTA 1000 týrnırinde 1/8 fınalǵa ótkenin jazǵan bolatynbyz.