Elena Rybakına Dohadaǵy týrnırdiń úshinshi aınalymyna joldama aldy
ASTANA. KAZINFORM – Qazaqstannyń birinshi, álemniń 3-raketkasy Elena Rybakına Doha (Qatar) WTA 1000 týrnıriniń úshinshi aınalymyna shyqty.
Atalǵan jarystyń 2-raketkasy bolyp tirkelgen Rybakına ekinshi aınalymda dúnıejúzilik reıtıngide 33-orynda turǵan Van Sınıýıǵa tap keldi.
Qarsylastar osyǵan deıin ózara eki ret kezdesip, onda qazaqstandyq tennısshi jeńgen edi. Bul joly birinshi partııada E.Rybakına 4:2 esebimen alǵa shyqty. Sosyn taǵy bir breıkpen túıindedi – 6:2.
Ekinshi sette qytaılyq tennısshi 4:2 esebimen alǵa ketkenimen, qazaqstandyq sportshy qatarynan tórt geım aldy – 6:4. Bir saǵat 21 mınýtqa sozylǵan básekede Rybakına 2 eıspen birge 9 breık-poınttyń tórteýin paıdalandy. Van Sınıýı 1 eıs, 1 breıkten (3 breık-poınt) asa almady.
Elena Rybakına shırek fınalǵa shyǵý úshin álemniń 26-raketkasy, qytaılyq Chjen Tsınven nemese reıtıngide 77-satydaǵy amerıkalyq Alısııa Parkstiń bireýimen talasady.
Eske sala keteıik, budan buryn Elena Rybakınanyń Qatarda 8-14 aqpan aralyǵynda Doha WTA 1000 týrnırine qatysatynyn jazǵan edik.
Sondaı-aq Anna Danılına álemdik reıtıngide TOP-10-ǵa qaıta kirdi.
Denıs Evseev Úndistandaǵy týrnırde sensatsııa jasady.
