Elena Rybakına Dohada AQSh chempıonatynyń fınalısin jeńip, jartylaı fınalǵa shyqty

DOHA. KAZINFORM – Qazaqstannyń birinshi, álemniń 4-raketkasy Elena Rybakına Doha (Qatar) WTA 1000 týrnıriniń jartylaı fınalyna shyqty.

Qazaqstandyq tennısshi shırek fınalda álemniń 38-raketkasy, 2021 jylǵy AQSh ashyq chempıonatynyń fınalısi, kanadalyq Leıla Fernandespen oınady.

Bul qos tennısshiniń ózara birinshi kezdesýi edi.

Kanadalyq tennısshi matchty qarqyndy bastady – 4:1. Degenmen budan keıin Rybakına qatarynan bes geımdi aldy – 6:4.

Ekinshi sette Elena esep 3:2 bolǵan mezette breık jasaı aldy. Aqyry matchty taǵy bir breıkpen túıindedi – 6:2.

Bir saǵat 34 mınýtqa sozylǵan báseke barysynda Rybakına 6 eıspen birge 11 breık-poınttyń beseýin óz esebine jazdy. L.Fernandes 1 eıs, 2 breıkten (6 breık-poınt) asa almady.

Elena Rybakına fınalǵa shyǵý úshin álemniń 32-raketkasy, 2021 jylǵy Rolan Garros jarysynyń fınalısi, reseılik Anastasııa Pavlıýchenkovamen talasady. Ol shırek fınalda reıtıngide 63-satydaǵy amerıkalyq Danıel Kollınzden aılasyn asyrdy – 7:5, 6:4.

Qazaqstandyq sportshy sol Rolan Garrosta shırek fınalda reseılik tennısshige 7:6 (7:2), 2:6, 7:9 esebimen ese jibergen edi.

Eske sala keteıik, budan buryn Aleksandr Shevchenkonyń Rotterdamda sensatsııa jasap, álemniń 7-raketkasyn utqanyn jazǵan bolatynbyz.