Elena Rybakına Doha týrnıriniń shırek fınalyna ótti

ASTANA. KAZINFORM – Qazaqstannyń birinshi, álemniń 4-raketkasy Elena Rybakına Doha (Qatar) WTA 1000 týrnıriniń shırek fınalyna shyqty.

Jarystyń 3-raketkasy bolyp tirkelgen qazaqstandyq tennısshi úshinshi aınalymda dúnıejúzilik reıtıngide 23-orynda turǵan amerıkalyq, 22 jastaǵy Emma Navarromen sheberlik baıqasty.
Birinshi partııada Rybakına 5:0 esebimen alǵa ketip, bet qaratpady – 6:1.

Kerisinshe tartysty órbigen ekinshi sette taı-breıkte Navarronyń asyǵy alshysynan tústi – 7:6 (8:6).

Úshinshi, sheshýshi partııada Elena breık jasap, 4:2 esebimen alǵa shyqty. Aqyry osy basymdylyǵynan tanǵan joq – 6:4.

Eki saǵat 10 mınýtqa sozylǵan tartysty báseke barysynda qazaqstandyq sportshy 10 eıs jasap, 10 breık-poınttyń altaýyn múlt jibergen joq. E.Navarro 2 eıspen birge 4 breık-poınttyń ekeýin paıdalandy.

Elena Rybakına jartylaı fınalǵa shyǵý úshin álemniń 38-raketkasy, 2021 jylǵy AQSh ashyq chempıonatynyń fınalısi, kanadalyq Leıla Fernandespen talasady. Ol úshinshi aınalymda álemniń 7-raketkasy, bıylǵy Aýstralııa ashyq chempıonatynyń fınalısi, qytaılyq Chjen Tsınvendi utyp ketti – 7:5, 6:3.

Eske sala keteıik, budan buryn Mıhaıl Kýkýshkınniń Bahreındegi jarystyń shırek fınalyna shyqqanyn jazǵan bolatynbyz.

Aleksandr Býblık Rotterdamda tájirıbeli tennısshige jol berdi.