Elena Rybakına densaýlyǵyna baılanysty WTA qorytyndy týrnırinen bas tartty
ASTANA. KAZINFORM — Qazaqstandyq tennısshi, álemniń úzdik oıynshylarynyń biri Elena Rybakına densaýlyǵyna baılanysty AQSh-tyń Indıan-Ýells qalasynda ótetin WTA qorytyndy týrnırine qatyspaıtynyn málimdedi. Bul týraly Sports.kz habarlady.
— Barlyq jankúıerime jáne meni qoldaıtyn jandarǵa bıylǵy WTA qorytyndy týrnırinen bas tartýǵa májbúr bolǵanymdy ókinishpen habarlaımyn. Men úshin bul maýsym keremet ótti. Alaıda qazir aǵzam jarysqa qatysýǵa fızıkalyq turǵydan daıyn emes. Biraz ýaqyt úıde demalyp, kúsh jınap, 2027 jylǵy maýsymǵa daıyndalamyn. WTA qorytyndy týrnıri men úshin erekshe jarys. Osy aptada baq synaıtyn barlyq sportshyǵa sáttilik tileımin. Naýryz aıynda Indıan-Ýellske qaıta oralýdy asyǵa kútemin, — delingen Rybakınanyń málimdemesinde.
Rybakına ótken jyly Er-Rııadta birde-bir ret jeńilmeı jeńip alǵan chempıondyq ataǵyn qorǵaýy kerek edi.
Qazaqstandyq tennısshi 2026 jylǵy maýsymdy 54 jeńis jáne 14 jeńilispen aıaqtady. Sondaı-aq ol tórt týrnırde top jardy. Atap aıtqanda, Australian Open, Shtýtgart pen Nınbodaǵy jarystarda jáne US Open týrnırinde chempıon atandy.
Buǵan deıin Elena Rybakına ózin jaısyz sezinýine baılanysty Indıan-Ýellste WTA qorytyndy týrnıri qarsańynda ótýi tıis baspasóz máslıhatyn keıinge qaldyrǵan bolatyn.
