Elena Rybakına Brısben týrnıriniń úshinshi aınalymyna ótti

ASTANA. KAZINFORM — Qazaqstannyń birinshi, álemniń 5-raketkasy Elena Rybakına Brısben (Aýstralııa) WTA 500 týrnıriniń úshinshi aınalymyna shyqty. 

Jarystyń 3-raketkasy bolyp tirkelgen qazaqstandyq tennısshi ekinshi aınalymda reıtıngide 79-oryndaǵy qytaılyq Chjan Shýaıdy synap kórdi.

Elena matchty qarqyndy bastap, 5:1 esebimen alǵa ketti. Budan keıin qytaılyq sportshy esepti qysqartqanymen, Rybakına basymdylyǵyn saqtap qaldy — 6:3.

Esesine ekinshi sette Rybakına dop bergende, qatelikke boı aldyrdy — 1:3. Degenmen qazaqstandyq tennısshi tarazy basyn teńestirip qana qoımaı, ekinshi matchbolyn paıdalana bildi — 7:5.

Bir saǵat 13 mınýtqa sozylǵan básekede Rybakına 16 eıs jasap, 9 breık-poınttyń tórteýin óz esebine jazdy. Chjan Shýaı 3 eıs, 2 breıkpen (7 breık-poınt) shekteldi.

Elena Rybakına jyldyń alǵashqy jarysynda shırek fınalǵa shyǵý úshin álemniń 25-raketkasy, ıspanııalyq Paýla Badosa nemese reıtıngide 46-oryndaǵy chehııalyq Marı Boýzkovanyń qaı jeńgenimen talasady.

Qazaqstandyq tennısshi budan eki jyl buryn Brısben dodasynda úzdik shyqqan bolatyn. 
Eske sala keteıik, budan buryn Anna Danılınanyń Brısben týrnıriniń jartylaı fınalyna joldama alǵanyn jazǵan edik.