Elena Rybakına Beıjiń týrnırinde jarys jolynan shyǵyp qaldy

ASTANA. KAZINFORM – Qazaqstannyń birinshi, álemniń 10-raketkasy Elena Rybakına Beıjiń (Qytaı) WTA 1000 týrnıriniń tórtinshi aınalymyna shyǵa almady.

Jarystyń 8-raketkasy bolyp tirkelgen qazaqstandyq tennısshi úshinshi aınalymda álemdik reıtıngide 66-orynda turǵan germanııalyq Eva Lıspen sheberlik baıqasty.

Birinshi partııada germanııalyq sportshy 3:1 esebimen alǵa ketkenimen, Rybakına tarazy basyn teńestirdi – 3:3. Alaıda budan keıin Lıs qatarynan úsh geımdi aldy.

Ekinshi sette Elena aıqyn basymdylyq kórsetti – 6:1.

Úshinshi, sheshýshi sette Lıs taǵy da 2:0 esebimen alǵa shyqqanymen, qazaqstandyq tennısshi alysqa uzatpady - 2:2. Esep 3:3 bolǵanda, Rybakına breık jasaǵanymen, sol boıda óz geımin berip qoıdy – 4:4. Sodan keıin Lıs úshinshi matchbolyn múlt jibergen joq – 6:4.

Eki saǵat 14 mınýtqa sozylǵan básekede Rybakına 8 eıspen birge 9 breık-poınttyń jeteýin paıdalandy. Lıs 1 eıs, 7 breıkpen (20 breık-poınt) kózge tústi.

Osylaısha, Elena Rybakına Beıjińdegi jarys jolyn aıaqtady.

Eske sala keteıik, budan buryn Elena Rybakınanyń Beıjiń týrnıriniń úshinshi aınalymyna shyqqanyn jazǵan edik.