Elena Rybakına Berlınde Nıderlandtaǵy týrnırdiń chempıonymen kezdesýi múmkin

ASTANA. KAZINFORM — Qazaqstannyń birinshi, álemniń 4-raketkasy Elena Rybakına 17-23 maýsymda kógal tósenishinde ótetin Berlın (Germanııa) WTA 500 týrnırinde baq synaıdy.

Jarystyń 3-raketkasy bolyp tirkelgen Qazaqstannyń kóshbasshy tennısshisi birden ekinshi aınalymnan bastaıdy.

E.Rybakına qos reseılik, álemniń 15-raketkasy Lıýdmıla Samsonova nemese reıtıngide kezinde 9-orynǵa deıin kóterilgen, qazir 34-satydaǵy Veronıka Kýdermetovanyń qaı jeńgenimen kezdesedi.

Bulardyń ekeýi de osal shaǵylatyn jańǵaq emes. Ásirese, 16 maýsym kúni Hertogenbosh (Nıderland) WTA 250 dodasynyń fınalynda 2019 jylǵy AQSh chempıony, qazirgi kezde reıtıngide 228-orynda turǵan kanadalyq Bıanka Andreeskýdi 4:6, 6:3, 7:5 esebimen jeńip, chempıon atanǵan L.Samsonovanyń qarqyny qatty.

Berlın jarysynyń bıylǵy júlde qory — 922 573 AQSh dollary. Munda chempıon atanǵan tennısshi 142 myń dollar tabys taýyp, 500 reıtıngilik upaıǵa ıe bolady.

Berlın dodasyna álemniń 1-raketkasy, Polsha ókili Iga Shventek jáne bıyl sensatsııa jasap, Rolan Garrostyń fınalyna deıin jetken ıtalııalyq ıAsmın Paolını qatyspaıdy. Esesine Korı Gaýff (AQSh), Arına Sobolenko sııaqty myqtylar jeterlik. Ótken jyly Elena Rybakına ekinshi aınalymnan asa almaǵan edi.

E.Rybakına Berlınnen keıin Ulybrıtanııaǵa sapar shegip, Istborn men Ýımbldonda óner kórsetpekshi. Qazaqstandyq tennısshi 2022 jyly Ýımbldon chempıony atanǵany belgili. Sondyqtan onyń aldaǵy kógal tósenishindegi jarystardy sátti ótkizgeni mańyzdy. Sodan keıin Parıj olımpıadasy qyr astynda tur.

Eske sala keteıik, budan buryn Aleksandr Nedovesovtiń Germanııadaǵy týrnırdi sátti bastaǵanyn jazǵan bolatynbyz.