Elena Rybakına alǵash ret WTA qorytyndy týrnıriniń fınalyna shyqty

ASTANA. KAZINFORM — Qazaqstannyń birinshi, álemniń 6-raketkasy Elena Rybakına Er-Rııad qalasynda (Saýd Arabııasy) ótip jatqan WTA qorytyndy týrnıriniń fınalyna joldama aldy.

Qazaqstandyq tennısshi jartylaı fınalda álemniń 5-raketkasy, amerıkalyq Djessıka Pegýlamen sheberlik baıqasty.

Osyǵan deıin qarsylastar ózara bes ret kezdesip, sonyń úsheýinde Pegýla basym túsken edi.

Birinshi partııada amerıkalyq tennısshi breık jasap, 2:1 esebimen alǵa ketkenimen, Rybakına tarazy basyn teńestirdi. Alaıda izinshe óz geımin berip qoıyp, qarymta qaıtara almady – 4:6.

Ekinshi sette Elena 4:1 esebimen alǵa shyqty. Áıtse de setke dop bergende, sol múmkindigin múlt jiberdi – 4:5. Degenmen taǵy bir breıkpen túıindedi – 6:4.

Úshinshi, sheshýshi partııada esep 3:2 bolǵan mezette qazaqstandyq tennısshi breıkke qol jetkizdi. Pegýla qaıyra breık jasaǵanymen, Rybakına aqyry matchty jeńispen aıaqtady – 6:3.

Eki saǵat 7 mınýtqa sozylǵan tartysty básekede E.Rybakına 15 eıspen birge 11 breık-poınttyń beseýin óz esebine jazdy. Pegýla 1 eıs, 4 breıkpen (8 breık-poınt) kózge tústi.

Osylaısha, ótken jylǵy fınalısti joldan taıdyrǵan E.Rybakına qazaqstandyq tennısshilerdiń qatarynan tuńǵysh ret jyldyń qorytyndy jarysynda fınalǵa shyqty.

- Pegýla matchty jaqsy bastady. Men jaılaý qımyldadym. Degenmen ekinshi sette óz oıynymdy tapqanyma qýanyshtymyn. 15 eıs te kómektesti. Eń sońynda sátti óner kórsettim. Osynda maǵan qoldaý kórsetken barlyq jankúıerlerime alǵys aıtamyn, - dedi E.Rybakına.

Elena Rybakına fınalda álemniń 1-raketkasy, Bedarýs sportshysy Arına Sobolenko nemese reıtıngide 4-oryndaǵy taǵy bir amerıkalyq Amanda Anısımovanyń qaı jeńgenimen talasady.

Eske sala keteıik, budan buryn WTA qorytyndy týrnırinde Elena Rybakınanyń úshinshi jeńisine qol jetkizgenin jazǵan edik.

Sondaı-aq Elena Rybakınanyń jartylaı fınaldaǵy qarsylasy anyqtaldy.