Elena Rybakına alǵash ret Shtýtgart týrnıriniń chempıony atandy

ShTÝTGART. KAZINFORM — Qazaqstannyń birinshi, álemniń 4-raketkasy Elena Rybakına Shtýtgart (Germanııa) WTA 500 týrnıriniń chempıony atandy.

Qazaqstandyq tennısshi fınalda álemniń 27-raketkasy, ýkraınalyq Marta Kostıýkpen chempıondyq ataqty sarapqa saldy.

Qarsylastar osyǵan deıin eki márte kezdesken edi. 2023 jyly Adelaıde (Aýstralııa) týrnırinde Kostıýk 6:7 (5:7), 6:2, 6:3 esebimen utsa, AQSh ashyq chempıonatynda Rybakına ese qaıyrǵan edi – 6:2, 6:1.

Bul joly qazaqstandyq tennısshi matchty breıkpen bastady – 2:0. Budan keıin esepti 5:2-ge jetkizip, setke dop bergende, óz múmkindigin jibergen joq – 6:2. 

Ekinshi partııada da Rybakına 2:0 esebimen alǵa ketti. Taǵy bir breık – 5:2. Sodan soń tórtinshi matchbolyn paıdalana aldy – 6:2.

Bir saǵat 9 mınýtqa sozylǵan matchta qazaqstandyq sportshy eıs jasamaǵanymen, 6 breık-poınttyń tórteýin paıdalandy. 

Osylaısha, Elena Rybakına óz sporttyq jolynda alǵash ret Shtýtgart jarysynyń chempıony atandy. Ol 500 reıtıngilik upaıǵa qosa «Porshe» avtokóligine ıe boldy.

Eske sala keteıik, budan buryn Elena Rybakınanyń Shtýtgartta álemniń 1-raketkasyn jeńip, fınalǵa shyqqanyn jazǵan bolatynbyz.