Elena Rybakına álemdik reıtıngide úzdik bestikke endi
ASTANA. KAZINFORM — Áıelder tennısi qaýymdastyǵy (WTA) jekeleı jáne juptyq synda jańartylǵan reıtıngini jarııalady.
Er-Rııadta ótken jyldyń qorytyndy týrnırinde jeńimpaz atanǵan Qazaqstannyń birinshi raketkasy Elena Rybakına amerıkalyq Djessıka Pegýlany yǵystyryp, besinshi satyǵa kóterildi.
Qazaqstandyq tennısshi dúnıejúzilik reıtıngidegi úzdik kórsetkishi — 3-orynǵa jaqyndap keledi.
Jyldyń qorytyndy týrnırindegi jeńisinen keıin E.Rybakına 2026 jylǵy jańa maýsymda osy qarqynyn jalǵastyrýǵa úmittenetinin jetkizdi.
— Tıtýl meni burynǵydan da kóbirek jumys isteýge yntalandyrady. Biz jarystar arasynda jaqsy ilgerileýge qol jetkizdik. Tipti babymda bolmaǵannyń ózinde jaqsy oıyn órnegin kórsettim. Ár mańyzdy matchtan úlken tájirıbe jınaısyń. Bul joly bári men oılaǵandaı boldy. Osy týrnırde bolǵan barlyq oń nárseni aldaǵy mańyzdy matchtarda jalǵastyrýǵa tyrysamyn, — dedi Rybakına.
Ataqty tennısshi Serena Ýılıamstiń burynǵy bapkeri Rık Machchı óziniń áleýmettik jelidegi paraqshasynda pikirin jazyp, Elena Rybakınanyń 2026 jyly álemniń birinshi raketkasy bolatyndaı múmkindigi bar ekendigin jetkizdi.
Álemdik reıtıngide Belarýs ókili Arına Sobolenko burynǵysha kósh bastasa, polıak Iga Shventek ekinshi, amerıkalyq Korı Gaýff úshinshi satyda tur.
Taǵy bir qazaqstandyq ıÝlııa Pýtıntseva 73-orynda qaldy.
Juptyq synda Qazaqstannyń birinshi raketkasy Anna Danılına 13-ten 15-ke, ıÝ.Pýtıntseva 105-ten 106-ǵa syrǵysa, Jibek Qulambaeva 132-den 130-ǵa joǵarylady.
Eske sala keteıik, budan buryn Rybakınanyń WTA qorytyndy týrnırin utqan alǵashqy azııalyq tennısshi atanǵanyn jazǵan edik.
Sondaı-aq Qasym-Jomart Toqaev tennısshi Elena Rybakınany jeńisimen quttyqtady.