Elena Rybakına álemdik reıtıngide TOP-10-nan shyǵyp qaldy

ASTANA. KAZINFORM — Áıelder tennısi qaýymdastyǵy (WTA) jańartylǵan reıtıngini jarııa etti.

Qazaqstandyq tennısshi, 2022 jylǵy Ýımbldon chempıony Elena Rybakına 3 308 upaımen 10-nan 11-orynǵa yǵysty.

Onyń ornyna úzdik ondyqqa amerıkalyq Emma Navarro (3 797 upaı) kirdi.

Osylaısha, E.Rybakına 2023 jylǵy 30 qańtardan beri alǵash ret TOP-10-nan shyǵyp qaldy. Úzdik 10 tennısshiniń qatarynda qazaqstandyq tennısshi 116 apta boıy boldy. 

Bıyl Bıllı Djın Kıng kýbogynyń irikteý týrnırinde Qazaqstan quramasy sapynda óner kórsetýine baılanysty E.Rybakına Germanııadaǵy Shtýtgart WTA 500 jarysynda ótken jylǵy chempıondyq ataǵyn qorǵaı almaı, 500 reıtıngilik upaıynan aıyrylǵan edi.

Shtýtgartta latvııalyq Elena Ostapenko úzdik atandy. Ol shırek fınalda álemniń 2-raketkasy, Polsha ókili Iga Shventekti joldan taıdyrdy – 6:3, 3:6, 6:2. Al fınalda álemniń 1-raketkasy, belorýssııalyq Arına Sobolenkony qapy qaldyrdy – 6:4, 6:1.

Eske sala keteıik, budan buryn Elena Rybakına qatysatyn Madrıd týrnıriniń jerebesi tartylǵanyn jazǵan bolatynbyz.