Elena Rybakına álemdik reıtıngide kósh bastaý múmkindigi týraly aıtyp berdi
ASTANA. KAZINFORM — Ýımbldon týrnıri qarsańynda qazaqstandyq tennısshi Elena Rybakına osy dodadan keıin álemniń birinshi raketkasy bolý múmkindigi týraly áńgimelep berdi.
Londondaǵy baspasóz máslıhatynda E.Rybakınanyń málim etkenindeı, álemdik reıtıngide kósh bastasa, bul keremet nátıje bolar edi.
— Biraq shynymdy aıtsam, bul týraly kóp oılanbaımyn. Óıtkeni osyǵan deıingi oıyn nátıjeleri kóńildegideı bolǵan joq. Qazirgi kezde men úshin ár matchtan kelesisine senimdi qadam basý mańyzdy, - dedi ol.
2022 jylǵy Ýımbldon chempıony kógaldaǵy maýsymǵa daıyndyq barysynda dene daıyndyǵy men osyndaı korttaǵy oıynǵa beıimdelýge ekpin túsirilgenin atap ótti.
— Dene daıyndyǵy turǵysynan qarasaq, kógaldaǵy kortta alǵashqy soqqydan-aq belsendi bolyp, oıyn tizginin birden qolǵa ala bilý asa mańyzdy. Biz buǵan ázir bolý úshin kóp jumys istedik, Rolan Garrostan keıin mende daıyndyqqa ýaqyt jetkilikti boldy. Jaqsy jumys istedik dep úmittenemin. Munyń bári týrnırde paıdaǵa asa ma, kóremiz. Degenmen menińshe, bári dene daıyndyǵynan bastalady, sodan keıin tikeleı kortqa beıimdelesiń, — dedi tennısshi.
Rybakınadan baspasóz máslıhatyna qatysýshylar 2022 jyly Ýımbldonda jeńimpaz atanǵan kezben qazirgi kóńil kúıdi salystyrýdy ótindi. Onyń sózine qaraǵanda, ondaı tabysty ózi kútpegen edi. Al týrnırdiń sheshýshi básekelerinde óner kórsetý tájirıbe jınaqtap, mundaı jaǵdaılardy sabyrly qabyldaýǵa múmkindik berdi.
— Men 2022 jylǵy jeńisti múldem kútpegen edim, óıtkeni oǵan deıin mende mundaı tamasha nátıje bolǵan joq. Bári kútpegen jerden boldy. Buryn týrnırlerde bulaı uzaq oınaǵan joq edim. Shırek jáne jartylaı fınaldan bastap men mazasyz kúıge tústim. Odan keıin qalaı bolatynyn bilmegennen keıin uıyqtaý da qıynǵa soqty. Degenmen osynyń bárin jeńe bilip, tıtýldy jeńip alǵanyma maqtanamyn. Budan soń seni qandaı jol kútetinin bilesiń, kóp eshteńe tańǵaldyra almaıdy, — dedi Rybakına.
Budan bólek, 27 jastaǵy qazaqstandyq sportshy týrnırge daıyndyq barysynda óziniń úzdik matchtarynyń beınejazbalaryn qaıta qaraı ma, soǵan da jaýap berdi. Onyń pikirinshe, beınetaldaý jattyǵý úderisiniń mańyzdy bóligi bolyp qala beredi, bul tıimdi oıyn sheshimderin tabýǵa septesedi.
— Iá, men keıbir beınetaspalardy, ásirese, ózim jaqsy oınaǵan sátterdi qaıta qaraımyn. Eger qazir bir nárse úılespese, burynǵy oıynǵa qaıta oralyp, paıdalysyn alý artyq etpeıdi. Munyń sol jeńisti týrnırden bolýy mindetti emes. Bul bir jyl burynǵy nemese basqa oıyn sáti bolýy múmkin nemese ne nársege qol jetti, sony qaraýǵa bolady. Sondyqtan biz árkez beınetaspany qaıta qarap, oıynǵa taldaý jasaýǵa tyrysamyz, — dep qosty tennısshi.
Álemniń ekinshi raketkasy Ýımbldonnyń alǵashqy aınalymda WTA reıtıngisinde 154-orynda turǵan, 23 jastaǵy frantsııalyq Loıs Býassonmen kezdesedi.
2025 jyly frantsııalyq tennısshi óz elindegi Rolan Garrosta sensatsııa jasap, jartylaı fınalǵa deıin jetti. Ol týrnır barysynda álemdik reıtıngide alǵashqy ondyqqa kiretin reseılik Mırra Andreeva men amerıkalyq Djessıka Pegýlany jeńdi. Keıin ol Gambýrgte WTA jarysynda sporttyq jolyndaǵy alǵashqy tıtýlyna qol jetkizip, maýsymdy rekordtyq kórsetkishpen – álemdik reıtıngide 36-orynmen qorytyndylady.
Eske sala keteıik, budan buryn Jibek Qulambaevanyń Polshadaǵy týrnırdiń fınalyna shyqqanyn jazǵan edik.
Sondaı-aq qazaqstandyq tennısshiler úshin Ýımbldon týrnıri bıyl sátti bola ma, ol da habarlandy.
